ଭୁବନେଶ୍ବର : ରାଜ୍ୟରେ ଦିନକୁ ଦିନ ମହିଳା ନିର୍ଯାତନା ବଢ଼ିବାରେ ଲାଗିଛି। ରାଜ୍ୟ ମହିଳା ଆୟୋଗଙ୍କ ତଥ୍ୟ ଅନୁଯାୟୀ ଗତ ୯ ବର୍ଷରେ ରାଜ୍ୟରେ ମହିଳା ଓ ଶିଶୁଙ୍କ ଉପରେ ନିର୍ଯାତନା ଅଭିଯୋଗରେ ୨୭ ହଜାର ୭୨୩ଟି ମାମଲା ଦରଜ ହୋଇଛି। ବିଧାନସଭାରେ ଏ ସଂକ୍ରାନ୍ତ ଏକ ଅଣତାରକା ପ୍ରଶ୍ନରେ ଏପରି ତଥ୍ୟ ରଖିଛନ୍ତି ମହିଳା ଓ ଶିଶୁ ବିକାଶ ମନ୍ତ୍ରୀ ପ୍ରଫୁଲ୍ଲ ସାମଲ।
ସରକାରୀ ରେକର୍ଡ଼ କହୁଛି, ୨୦୧୦ରୁ ୨୦୧୮ ଭିତରେ ଖୋର୍ଦ୍ଧା ଜିଲ୍ଲାରେ ସର୍ବାଧିକ ମହିଳା ଓ ଶିଶୁ ନିର୍ଯାତନା ଘଟଣା ସାମନାକୁ ଆସିଛି। ଏହି ଜିଲ୍ଲାରେ ଗତ ୯ବର୍ଷ ଭିତରେ ୫ ହଜାର ୨୨୭ଟି ନିର୍ଯାତନା ମାମଲା ଦରଜ ହୋଇଛି। ୨୦୧୦ରେ ଏହି ଜିଲ୍ଲାରେ ୪୧୭ଟି ମାମଲା ରୁଜୁ ହୋଇଥିବାବେଳେ ୨୦୧୩ରେ ସର୍ବାଧିକ ୬୯୧, ୨୦୧୪ରେ ୬୪୩, ୨୦୧୫ରେ ୬୮୯, ୨୦୧୭ରେ ୬୩୫ ଓ ୨୦୧୮ରେ ୬୧୦ଟି ମହିଳା ଓ ଶିଶୁ ନିର୍ଯାତନା ଘଟଣା ଘଟିଛି। ଖୋର୍ଦ୍ଧା ଜିଲ୍ଲା ତଳକୁ ରହିଛି କଟକ । କଟକରେ ଏହି ବର୍ଷ ଭିତରେ ମୋଟ ୨ ହଜାର ୬୦୮ଟି ନିର୍ଯାତନା ଘଟଣା ଘଟିଛି। ମହିଳା ନିର୍ଯାତନା ଘଟଣାରେ ପୁରୀ ତୃତୀୟ ସ୍ଥାନରେ ରହିଛି। ଜିଲ୍ଲାରେ ମୋଟ ୨ ହଜାର ୧୫୭ଟି ଘଟଣା ସାମ୍ନାକୁ ଆସିଛି। ଗଞ୍ଜାମରେ ୧୭୫୩, ଭଦ୍ରକରେ ୧୫୩୮, କେନ୍ଦ୍ରାପଡ଼ାରେ ୧୩୭୭ ଓ ବାଲେଶ୍ବର ଜିଲ୍ଲାରେ ୧୩୭୪ଟି ନିର୍ଯାତନା ମାମଲା ହୋଇଛି। ମାଲକାନଗିରି ଜିଲ୍ଲାରେ ସବୁଠୁ କମ ମହିଳା ଓ ଶିଶୁ ନିର୍ଯାତନା ଘଟଣା ରୁଜୁ ହୋଇଥିବା ମନ୍ତ୍ରୀ ଉତ୍ତରରେ ଦର୍ଶାଇଛନ୍ତି। ଏହି ଜିଲ୍ଲାରେ ଗତ ୯ ବର୍ଷ ଭିତରେ ମାତ୍ର ୮୭ଟି ମାମଲା ହୋଇଥିବା ଶ୍ରୀ ସାମଲ କହିଛନ୍ତି।
Prasanta Patnaik