ଯାଜପୁରରୋଡ଼ , ଜାନୁଆରୀ ୨୦ : ଯାଜପୁରରେ କୋବିର ଅଭାବୀ ବିକ୍ରି। କୋବି ଉତ୍ପାଦନ ଯେତିକି ହେଉଛି ତାହା ବିକ୍ରି ହେଉନାହିଁ। ଗୋଟିଏ କୋବି ଉତ୍ପାଦନ ପାଇଁ ଚାଷୀ ପାଖାପାଖି ୫ ଟଙ୍କା ଖର୍ଚ କରୁଥିବା ବେଳେ ଏବେ ପାଉଛି ମାତ୍ର ଟଙ୍କାଟିଏ। ଯାହାକି ଖର୍ଚର ୪ ଭାଗରୁ ବି କମ୍ ମିଳୁଛି। ବାହାର ରାଜ୍ୟର ଦଲାଲ ସ୍ଥାନୀୟ ପରିବା ବାଜରକୁ ନିୟନ୍ତ୍ରଣ କରି ଏଭଳି କୃତ୍ରିମ ସଂକଟ ସୃଷ୍ଟି କରୁଥିବା ନେଇ ଅଭିଯୋଗ ହେଉଛି। ଅନ୍ୟ ପଟେ ଫଳରେ ଚାଷୀ ବ୍ୟାପକ କ୍ଷତି ସହୁଛି।
ସରକାର ବିଭିନ୍ନ ବର୍ଗର ଲୋକଙ୍କ ପାଇଁ ବିଭିନ୍ନ ଉନ୍ନୟନ ମୂଳକ କାର୍ଯ୍ୟକ୍ରମ ହାତକୁ ନେଉଥିଲେ ମଧ୍ୟ ଚାଷୀକୁଳଙ୍କ ଉତ୍ପାଦକୁ ବିକ୍ରି କରିବା ପାଇଁ ସେମିତି କୌଣସି ଠୋସ୍ ପଦକ୍ଷେପ ନେଉ ନଥିବା ଅଭିଯୋଗ ହେଉଛି। ଆବଶ୍ୟକ ଶୀତଳ ଭଣ୍ଡାରର ଅଭାବ ଯୋଗୁଁ ଚାଷୀ ତାର ଉତ୍ପାଦକୁ ସାଇତି ରଖି ପାରୁନାହିଁ। ଫଳରେ ଇଚ୍ଛା ନଥିଲେ ବି କ୍ଷତି ସହି ଉତ୍ପାଦକୁ ବିକ୍ରି କରିଦେଉଛି।
କେବଳ ରସୁଲପୁର ବ୍ଲକ ନୁହେଁ, ପଡ଼ୋଶୀ ବରୀ, ଧର୍ମଶାଳା, କୋରେଇ ଆଦି ବ୍ଲକର ବହୁ ଚାଷୀ ନିଜର ଉତ୍ପାଦିତ ପରିବା ଆଣି ବାରବାଟୀ ବଜାରରେ ବିକ୍ରି କରିଥାନ୍ତି। ଉଭୟ ଖାଉଟି ଓ ବ୍ୟବସାୟୀ ଫଲକୋବି କିଣୁ ନଥିବା ଏବଂ ବଜାରରେ ଏହାର ଚାହିଦା ନଥିବାରୁ ଏବେ କୋବି ବ୍ୟବସାୟ ମାନ୍ଦା ହେଉଛି। କେତେକ ଚାଷୀ ଆଉ ବିଲରୁ କୋବି କାଟିବାକୁ ପସନ୍ଦ କରୁନାହାନ୍ତି।
ନୟାଗଡ଼ରେ କେଜିକୁ ଟଙ୍କାଏ
ନୟାଗଡ଼ : ନୟାଗଡ଼ ଜିଲ୍ଲାରେ ପନିପରିବା ଚାଷର ପେଣ୍ଠସ୍ଥଳୀ ଓଡ଼ଗାଁ, ରଣପୁର ତଥା ଅନ୍ୟ ଅଞ୍ଚଳର ଚାଷୀ ଚିନ୍ତାରେ। ବିଶେଷ କରି ଫୁଲ କୋବି, ବନ୍ଧା କୋବି ଚାଷର ପ୍ରମୁଖ ସ୍ଥାନ ପାଲଟିଥିବା ଓଡ଼ଗାଁ ଅଞ୍ଚଳର ଗୋଡ଼ିପଲ୍ଲୀ ପଞ୍ଚାୟତବାସୀ କୋବି ଦରକୁ ନେଇ ବର୍ତ୍ତମାନ ଚିନ୍ତାରେ। ଏହି ପଞ୍ଚାୟତ ଅଧୀନସ୍ଥ ଗୋଡ଼ିପଲ୍ଲୀ ଗ୍ରାମବାସୀ, ଖଲିପାଟଣା, ଅଭିମାନପୁର, ମଶାବାରିର ଚାଷୀଙ୍କ ସମେତ ପନ୍ତାଖରୀ ଗ୍ରାମପଞ୍ଚାୟତର ବିଭିନ୍ନ ଗ୍ରାମବାସୀ ଚଳିତବର୍ଷ ଅଭାବୀ ବିକ୍ରିର ଶିକାର ହେଉଥିବା ଦେଖାଯାଇଛି। ଗତ ଏକ ସପ୍ତାହ ହେବ ଚାଷୀମାନେ ଗୋଦାମକୁ କେଜି ପ୍ରତି କୋବି ୩ ଟଙ୍କାରେ ବିକ୍ରି କରୁଛନ୍ତି। ଏଥିରେ ପରିବା ଗୋଦାମ ମାଲିକଙ୍କ କମିସନ୍, ଗାଡି ଭଡ଼ା, ମଜୁରୀ ଓ ଅନ୍ୟାନ୍ୟ ଆନୁଷଙ୍ଗୀକ ଖର୍ଚ୍ଚ ପରେ ଚାଷୀ ମାତ୍ର ଟଙ୍କାଟିଏ ପାଉଥିବା ଓଡ଼ଗାଁର ଗୋଡ଼ିପଲ୍ଲୀ ଗ୍ରାମର ଚାଷୀମାନେ କହିଛନ୍ତି।
Prasanta Patnaik