ନୂଆଦିଲ୍ଲୀ : ଗତ ରବିବାର ନିର୍ବାଚନ କମିସନର ସୁନୀଲ ଆରୋରା ନିର୍ବାଚନର ତାରିଖ ସହ କେତୋଟି ପର୍ଯ୍ୟାୟରେ ନିର୍ବାଚନ ହେବ ଏବଂ ଫଳାଫଳ ଘୋଷଣାର ତାରିଖ ଘୋଷଣା କରିଥିଲେ । ନିର୍ବାଚନର ତାରିଖ ଘୋଷଣା ସହ ରାଜନୈତିକ ଦଳ ଏବଂ ପ୍ରାର୍ଥୀମାନଙ୍କୁ କେଉଁ କେଉଁ ନିୟମର ପାଳନ କରିବାକୁ ହେବ, ତାହା ସ୍ପଷ୍ଟ କରିଥିଲେ ନିର୍ବାଚନ କମିସନର । ତେବେ ନିର୍ବାଚନ କମିସନରଙ୍କ ଘୋଷଣା ପରେ ଏବେ ସବୁ ଦଳ ନିଜ ନିଜର ପ୍ରାର୍ଥୀ ଚୟନର ପ୍ରକିୟାକୁ ସକ୍ରିୟ କରିଥିବା ଜଣା ପଡ଼ିଛି । କିଛି ଦଳ ନିଜ ନିଜର ପ୍ରାର୍ଥୀମାନଙ୍କ ନାଁ ଘୋଷଣା କରି ସାରିଥିବା ବେଳେ ବିଜେପି ମାର୍ଚ୍ଚ ୧୬ରେ ନିଜର ପ୍ରାର୍ଥୀ ତାଲିକା ଘୋଷଣା କରିବ ବୋଲି ଜଣା ପଡ଼ିଛି । ତେବେ ଏହି ତାଲିକାରୁ ୮୦-୯୦ଜଣ ସାଂସଦଙ୍କ ଟିକେଟ କଟିପାରେ ବୋଲି ଆଶଙ୍କା କରାଯାଉଛି ।
ମାର୍ଚ୍ଚ ୧୬ରେ ଉତ୍ତରପ୍ରଦେଶ, ମହାରାଷ୍ଟ୍ର, ବିହାର, ମଧ୍ୟପ୍ରଦେଶ, ରାଜସ୍ଥାନ, ଉତ୍ତରାଖଣ୍ଡ, ହିମାଚଳ ପ୍ରଦେଶ ଏବଂ ପଶ୍ଚିମବଙ୍ଗର ଅଧାରୁ ଅଧିକ ଲୋକସଭା ସିଟ୍ଗୁଡ଼ିକ ପାଇଁ ପ୍ରାର୍ଥୀମାନଙ୍କର ପ୍ରଥମ ତାଲିକା ଘୋଷଣା କରିବାକୁ ଯାଉଛି ବିଜେପି । ଏ ନେଇ ଦଳ ମଧ୍ୟରେ ଜୋର୍ଦାର ଆଲୋଚନା ଚାଲୁ ରହିଥିବା ବେଳେ ୮୦-୯୦ ସାଂସଦଙ୍କ ଟିକେଟ କଟିପାରେ ବୋଲି ସୂଚନା ମିଳିଛି । ତେବେ ଏ ନେଇ ବିଜେପି ପକ୍ଷରୁ କୌଣସି ଅଧିକାରୀକ ଘୋଷଣା କରାଯାଇ ନଥିବା ଜଣା ପଡ଼ିଛି ।
Prasanta Patnaik