ଭୁବନେଶ୍ୱର, ଡିସେମ୍ବର ୨୭ : କୋଟି କୋଟି ଟଙ୍କା ଠକି ନେଉଛନ୍ତି କନ୍ସଲ୍ଟାନ୍ସି ଏଜେନ୍ସି। ଭଡ଼ାଘରେ ଚାଲିଛି ଏହି କେଳେଙ୍କାରୀ। ଭଡ଼ା ନେଇ ଅଫିସ୍ କରିବା ପରେ ଟାର୍ଗେଟ ହେଉଛନ୍ତି ଗାଁ ଗହଳିର ବେକାର ଯୁବକ/ଯୁବତୀ। ଚାକିରି ଆଳରେ ଆଦାୟ ହେଉଛି ମୋଟା ଅଙ୍କର ଟଙ୍କା। ଏହା ପରେ ଅଫିସ ବନ୍ଦ, କର୍ମଚାରୀ ଉଭାନ୍। ଅପହଞ୍ଚ ଦୂରତାରେ ମୋବାଇଲ। ତା’ ପରେ ଥାନାରେ ଜମୁଛି ଭିଡ଼। ପୁଲିସର ପାଲଟା ପ୍ରଶ୍ନରେ କାନମୁଣ୍ଡା ଆଉଁସି ଗାଁକୁ ଫେରିଯାଉଛନ୍ତି ଚାକିରି ଆଶାୟୀ ବେକାର ଯୁବକ/ଯୁବତୀ। ଏଭଳି ଏକ ଦୃଶ୍ୟ ଆଜି ଚନ୍ଦ୍ରଶେଖରପୁର ଥାନାରେ ଦେଖିବାକୁ ମିଳିଛି।
୧୫ରୁ ଊର୍ଦ୍ଧ୍ବ ହିତାଧିକାରୀ ଏଭଳି ଏକ କନ୍ସଲ୍ଟାନ୍ସି ଜାଲରେ ପଡ଼ି ହତାଶ ହେବା ପରେ ଥାନାର ଦ୍ବାରସ୍ଥ ହୋଇଛନ୍ତି। ଥାନାରୁ ହତାଶ ହେବା ପରେ ଏସିପି ଓ ପରେ ଡିସିପିଙ୍କ ପର୍ଯ୍ୟନ୍ତ ଯାଇଛନ୍ତି। ହେଲେ କନ୍ସଲ୍ଟାନ୍ସିର ଦେଖା ମିଳିନି। ତେବେ କେବଳ ଏହି ଗୋଟିଏ ସଂସ୍ଥା ନୁହେଁ, ବରଂ ଭୁବନେଶ୍ବରରେ ଶହ ଶହ ସଂସ୍ଥା ଏହାକୁ ଏକ ରୋଜଗାରର ମାଧ୍ୟମ କରିଛନ୍ତି। ତେବେ କେତେକ ସଂସ୍ଥା ଅଛନ୍ତି ଯେଉଁମାନେ ଏଭଳି ଠକଙ୍କ ପାଇଁ ବଦନାମ ହେଉଥିବା କହିଛନ୍ତି। ଅନ୍ୟପଟେ ଭଡ଼ାଟିଆଙ୍କ ତାଲିକା ପୁଲିସ ପାଖରେ ରହୁନାହିଁ। ନିର୍ଦ୍ଦେଶ ସତ୍ବେ ଘରମାଲିକ ଭଡ଼ାଟିଆଙ୍କ ବିବରଣୀ ଥାନାରେ ଦାଖଲ କରୁ ନଥିବାରୁ ପୁଲିସ ଭଡ଼ାଟିଆଙ୍କୁ ଖୋଜି ପାରୁନାହିଁ। ଫଳରେ ଏହି ସଂସ୍ଥା କୋଟି କୋଟି ଲୁଟି ଫେରାର୍ ହୋଇଯିବାକୁ ସକ୍ଷମ ହେଉଛି। ଅନ୍ୟପଟେ ଏହି ସଂସ୍ଥାଗୁଡ଼ିକ ସହ ପୁଲିସର ଭିତିରି ସମ୍ପର୍କ ରହୁଥିବା ମଧ୍ୟ ଅଭିଯୋଗ ହେଉଛି।
ଭୁବନେଶ୍ବରରେ ଘଟଣା ଘଟିଥିବାରୁ ସେଠାରେ ଯାଇ ଏତଲା ଦେବା ପାଇଁ ପରାମର୍ଶ ମିଳିଥିଲା। ଚନ୍ଦ୍ରଶେଖରପୁର ଥାନାରେ ନ୍ୟାୟ ନ ମିଳିବାରୁ ସେମାନେ ଏସିପି, ଡିସିପିଙ୍କ ଦ୍ବାରସ୍ଥ ହୋଇଛନ୍ତି। ୧୪ ତାରିଖରୁ ସେମାନେ ଏଭଳି ଦଉଡ଼ୁଥିଲେ ମଧ୍ୟ ଫଳ ଶୂନ ହୋଇଛି। ଗରିବ ଘରର ହୋଇଥିବାରୁ ଭୁବନେଶ୍ବର ଦଉଡ଼ିବା ତାଙ୍କ ପକ୍ଷରେ ସମ୍ଭବ ହୋଇ ନାହିଁ। ତେବେ କେବଳ ଏହି ଗୋଟିଏ ସଂସ୍ଥା ନୁହେଁ, ଭୁବନେଶ୍ବରର ରସୁଲଗଡ଼, ଜୟଦେବ ବିହାର, କଟକ ରୋଡ୍, ହଂସପାଳ ପ୍ରଭୃତି ଅଞ୍ଚଳରେ ଏଭଳି ସଂସ୍ଥାମାନ ରହିଛି। ଅନାୟାସରେ ଏମାନେ ବେକାର ଯୁବକ ଯୁବତୀଙ୍କୁ ଟାର୍ଗେଟ କରି ଅର୍ଥ ଉପାର୍ଜନ କରୁଛନ୍ତି। ତେବେ ସଂସ୍ଥା କର୍ମକର୍ତ୍ତାଙ୍କ ସହ ଯୋଗାଯୋଗ କରାଯାଇଛି। କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚନ୍ଦ୍ରଶେଖରପୁର ଥାନା ପକ୍ଷରୁ କୁହାଯାଇଛି।
Prasanta Patnaik