ନୂଆଦିଲ୍ଲୀ : କଡ଼ା ସୁରକ୍ଷା ବଳୟକୁ ଭେଦ କରି ୪ ଜଣ ଆତଙ୍କବାଦୀ ଓ ପାକିସ୍ତାନ ଗୁଇନ୍ଦା ସଂସ୍ଥା ଆଇଏସ୍ଆଇର ଜଣେ ଏଜେଣ୍ଟ ଗୁଜରାଟ ସୀମା ଦେଇ ଭାରତ ମଧ୍ୟକୁ ପଶି ଆସିଥିବା ଜଣାପଡ଼ିଛି। ଗୁଇନ୍ଦା ବିଭାଗ ଏହି ସୂଚନା ଦେବା ପରେ ରାଜସ୍ଥାନ ଓ ଗୁଜରାଟ ସମେତ ସମଗ୍ର ଦେଶରେ ହାଇଆଲର୍ଟ ଜାରି କରାଯାଇଛି। ରାଜସ୍ଥାନର ସିରୋହି ଏସ୍ପି କଲ୍ୟାଣମଲ ମୀନା ଏହି ଆତଙ୍କୀ ଆଲର୍ଟ ସମ୍ପର୍କରେ ଜିଲ୍ଲାର ସମସ୍ତ ପୁଲିସ୍ ଷ୍ଟେସନକୁ ଚିଠି ଲେଖି ଅବଗତ କରାଇଛନ୍ତି।
ଚିଠିରେ ସେ ଲେଖିଛନ୍ତି ଯେ “ଆଫଗାନିସ୍ତାନ ପାସପୋର୍ଟ ଧରି ୪ ଜଣ ଆତଙ୍କବାଦୀ ଓ ଜଣେ ଆଇଏସ୍ଆଇ ଏଜେଣ୍ଟ ଗୁଜରାଟ ଓ ରାଜସ୍ଥାନ ସୀମା ଦେଇ ଭାରତରେ ପ୍ରବେଶ କରିଛନ୍ତି। ଏମାନେ ଯେକୌଣସି ସମୟରେ ମଧ୍ୟ ଆତଙ୍କୀ କାର୍ଯ୍ୟକଳାପ ଭିଆଇ ପାରନ୍ତି। ତେଣୁ ଗୁଜରାଟ ଓ ରାଜସ୍ଥାନ ସମେତ ସମଗ୍ର ଦେଶରେ ହାଇଆଲର୍ଟ ଜାରି କରାଯାଇଛି।”
ଗୁଜରାଟ ଓ ମଧ୍ୟପ୍ରଦେଶ ସୀମାନ୍ତରେ ମଧ୍ୟ ଆତଙ୍କବାଦୀଙ୍କ ଗତିବିଧି ଠାବ କରାଯାଇଥିବା ଇଣ୍ଟିଲଜେନ୍ସି ବ୍ୟୁରୋ ପକ୍ଷରୁ ସୂଚନା ଦିଆଯାଇଛି। ମଧ୍ୟପ୍ରଦେଶର ଝାବୁଆ ଏସ୍ପି ବୀନିତ ଜୈନ କହିଛନ୍ତି, “ଆମକୁ ଆତଙ୍କବାଦୀଙ୍କ ଗତିବିଧି ସମ୍ପର୍କରେ ଭୋପାଲ ସ୍ଥିତ ପୁଲିସ୍ ମୁଖ୍ୟାଳୟରୁ ସୂଚନା ଦିଆଯାଇଛି।
ଏଥିପାଇଁ ଆମେ ସମଗ୍ର ରାଜ୍ୟରେ ହାଇଆଲର୍ଟ ଜାରି କରି ଯାଞ୍ଚ ପ୍ରକ୍ରିୟା ଆରମ୍ଭ କରିଛୁ। ବିଶେଷ କରି ଗୁଜରାଟ ଓ ରାଜସ୍ଥାନ ସୀମାରେ ସୁରକ୍ଷାକର୍ମୀଙ୍କୁ ଅଧିକ ସତର୍କତା ଅବଲମ୍ବନ କରିବାକୁ କୁହାଯାଇଛି। ଗୁଜରାଟରୁ ମଧ୍ୟପ୍ରଦେଶକୁ ଆସୁଥିବା ସମସ୍ତ ଗାଡ଼ିକୁ ତନତନ କରି ଯାଞ୍ଚ କରାଯାଉଛି। ସବୁ ପ୍ରକାରର ପରିସ୍ଥିତିର ମୁକାବିଲା କରିବାକୁ ଆମେ ପ୍ରସ୍ତୁତ ରହିଛୁ।”
Prasanta Patnaik