ନୂଆଦିଲ୍ଲୀ, ଫେବୃଆରୀ 03 : ବଢିବ ଭାରତୀୟ ବାୟୁସେନାର ଶକ୍ତି । ବାୟୁସେନାରେ ସାମିଲ ହେବ ଯୁଦ୍ଧ ବିମାନ ତେଜସ । କେନ୍ଦ୍ର ସରକାର ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡରୁ 83 ତେଜସ ଯୁଦ୍ଧ ବିମାନ କିଣିବା ପାଇଁ 48000 କୋଟି ଟଙ୍କାର ଚୁକ୍ତି କରିବେ । ଏହା ସର୍ବ ବୃହତ ସ୍ୱଦେଶୀ ପ୍ରତିରକ୍ଷା କ୍ରୟ ଚୁକ୍ତି ହେବ ।
ମାର୍ଚ୍ଚ 2024 ରେ ଭାରତୀୟ ବାୟୁସେନା ପାଇବ ସ୍ୱଦେଶୀ ବିକଶିତ ତେଜସ ଯୁଦ୍ଧ ବିମାନ । ବେଙ୍ଗାଲୁରୁରେ ‘ଏରୋ ଇଣ୍ଡିଆ’ ଏରୋସ୍ପେସ୍ ପ୍ରଦର୍ଶନୀରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ବାୟୁସେନା ଅଧିକାରୀ ଓ HAL ର ବରିଷ୍ଠ ଅଧିକାରୀଙ୍କ ଉପସ୍ଥିତିରେ ଏହି ଚୁକ୍ତିନାମା ସ୍ୱାକ୍ଷରିତ ହେବ ।
ଜାନୁଆରୀ 13 ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସିସିଏସ ବୈଠକରେ ବାୟୁସେନା ପାଇଁ ତେଜସ୍ ର ଉନ୍ନତ ସଂସ୍କରଣର ଏମକେ -1ଏ 73 ଟି ବିମାନ ଏବଂ 10 ଟି ଟ୍ରେନର ସଂସ୍କରଣ କିଣିବା ପାଇଁ ଚୁକ୍ତିକୁ ଅନୁମୋଦନ ମିଳିଛି । 48 ହଜାର କୋଟି ଟଙ୍କାରେ ଯୁଦ୍ଧ ବିମାନ ତେଜସର କ୍ରୟ ପାଇଁ ଚୁକ୍ତି ସ୍ୱାକ୍ଷରିତ ହେବ । ପ୍ରଥମ ପର୍ଯ୍ୟାୟରେ ଚାରିଟି ବିମାନ ତେଜସ ବାୟୁସେନାରେ ସାମିଲ ହେବ । ପରେ 2025 ରୁ 83 ତେଜସ ବିମାନ ଯୋଗାଣ ସରିବା ପର୍ଯ୍ୟନ୍ତ ପ୍ରତିବର୍ଷ 16 ଟି ବିମାନ ବାୟୁସେନାରେ ସାମିଲ ହେବ ।
ତେଜସ୍ MK-1A ହେଉଛି ଏକ ଅତ୍ୟାଧୁନିକ ଯୁଦ୍ଧ ବିମାନ, ଯାହା ସ୍ୱଦେଶୀ ବିକଶିତ । ଏହି ବିମାନଟି ଇଲେକ୍ଟ୍ରୋନିକ୍ ସ୍କାନ୍ ହୋଇଥିବା ଆକ୍ଟିଭ୍ ଏରେ ରାଡାର, ଆଉଟ୍ ଭିଜିବିଲିଟି ସ୍କୋପ୍ , କ୍ଷେପଣାସ୍ତ୍ର, ଇଲେକ୍ଟ୍ରୋନିକ୍ ଯୁଦ୍ଧ ପ୍ରଯୁକ୍ତିବିଦ୍ୟା ଏବଂ ବାୟୁ ଇନ୍ଧନ କ୍ଷମତା ସହ ରହିଛି ।
ତେଜସ୍ ଏକାସାଙ୍ଗରେ 9 ପ୍ରକାରର ଅସ୍ତ୍ର ଲୋଡ୍ କରି ଆକ୍ରମଣ କରିହେବ । ଏହି ବିମାନଟି ଆଣ୍ଟିଶିପ୍ କ୍ଷେପଣାସ୍ତ୍ର, ବୋମା ଏବଂ ରକେଟ୍ ସହିତ ସଜ୍ଜିତ ହୋଇଛି । ତେଜସ୍ ବାୟୁରୁ ବାୟୁ, ସ୍ଥଳ ଏବଂ ଜଳରେ ଥିବା ଶତ୍ରୁକୁ ମଧ୍ୟ ଆକ୍ରମଣ କରିପାରିବ । ତେଜସରେ ଜାମର ସୁରକ୍ଷା ପ୍ରଯୁକ୍ତିବିଦ୍ୟା ଅଛି ଯାହା ଦ୍ୱାରା ଦୁର୍ଗମ ଅଞ୍ଚଳରେ ମଧ୍ୟ ଯୋଗାଯୋଗ ହୋଇପାରିବ । ତେଜସ୍ ଏକ ସୁପରସୋନିକ୍ ଯୁଦ୍ଧ ବିମାନ, ଯାହା 15 କିଲୋମିଟର ଉଚ୍ଚତା ପର୍ଯ୍ୟନ୍ତ ଉଡିପାରେ । 42 ପ୍ରତିଶତ କାର୍ବନ ଫାଇବର, 43 ପ୍ରତିଶତ ଆଲୁମିନିୟମ ଏଲୟ ଏବଂ ଟାଇଟାନିୟମରୁ ତିଆରି ହୋଇଛି ତେଜସ୍ ।
Prasanta Patnaik