ନଡ଼ିଆ କତା ଭିତରେ ଅଧ କୋଟି ଟଙ୍କାର ଗଂଜେଇ ଚାଲାଣ

ଭୁବନେଶ୍ୱର, ଅକ୍ଟୋବର ୦୩ : ଅଭିନବ ଉପାୟରେ ଗଂଜେଇ ଚୋରା ଚାଲାଣ ହେଉଛି । ଏଥର ନଡ଼ିଆ କତା ଭିତରେ ଗଂଜେଇ ଚାଲାଣର ପର୍ଦ୍ଦାଫାସ କରିଛି ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋର ଭୁବନେଶ୍ୱର ଶାଖା । ପ୍ରାୟ ଅଧ କୋଟି ଟଙ୍କା ମୂଲ୍ୟର ଗଂଜେଇ ଜବତ କରିବା ସହିତ ଜଣେ ଅଭିଯୁକ୍ତ ଗିରଫ ହୋଇଥିବା ଜଣାଯାଇଛି ।

ସୂଚନା ଅନୁସାରେ ଆନ୍ଧ୍ରପ୍ରଦେଶରୁ ବାଲେଶ୍ୱର ଗଂଜେଇ ଚୋରା ଚାଲାଣ ହେଉଥିବା ନେଇ ଏନସିବିକୁ ବିଶ୍ୱସ୍ତ ସୂତ୍ରରୁ ସୂଚନା ମିଳିଥିଲା । ନଡ଼ିଆ କତା ବୋଝେଇ ଏକ ଟ୍ରକରେ ପ୍ରାୟ ୭୦୦ କିଲୋର ଗଂଜେଇ ଚାଲାଣ ହେଉଥିଲା । ଏହି ଟ୍ରକଟି ଭୁବନେଶ୍ୱର ଦେଇ ବାଲେଶ୍ୱର ପହଂଚିବା ପୂର୍ବରୁ ଏନସିବିର ଟିମ ଭୁବନେଶ୍ୱର-ଖୋର୍ଦ୍ଧା ରୋଡ଼ ଗୋଡ଼ିପଡ଼ା ଟୋଲଗେଟ ନିକଟରେ ଚଢ଼ାଉ କରିଥିଲା । ଏନସିବି ପକ୍ଷରୁ କୁହାଯାଇଛି ଯେ, ଜବତ ଗଂଜେଇର ମୂଲ୍ୟ ୫୦ ଲକ୍ଷ ଟଙ୍କା ହେବ । ଏନସିବି ଟ୍ରକକୁ ଜବତ କରିଥିବା ବେଳେ ଘଟଣାର ଅଧିକ ତଦନ୍ତ କରୁଛି ।