ଦୁର୍ଘଟଣାରେ ମା ସହ ୨ପୁଅ ଗୁରୁତର, ଉତ୍ତେଜନା

ରାଉରକେଲା, ୮ା୯  :   ବନ୍ଧମୁଣ୍ଡା ଅଞ୍ଚଳରେ ସ୍କୁଲକୁ ଛାଡ଼ିବାକୁ ଯାଇଥିବା ଜଣେ ମହିଳା ଦୁର୍ଘଟଣାର ଶିକାର ହୋଇ ଗୁରୁତର ଭାବେ ଆହତ ହୋଇଛନ୍ତି । ଏହି ଦୁର୍ଘଟଣାରେ ତାଙ୍କର ଦୁଇ ପୁଅ ମଧ୍ୟ ଆହତ ହୋଇଛନ୍ତି । ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତ୍ୟକ୍ତ ଲୋକେ ଟାୟାର ଜାଳି କ୍ଷତିପୂରଣ ଦାବିରେ ରାସ୍ତା ଅବରୋଧ କରିଛନ୍ତି । ପରିସ୍ଥିତିକୁ ଆୟତ୍ତ କରିବା ପାଇଁ ଏସ୍ପି ଡ. ଉମାଶଙ୍କର ଦାଶ ଓ ରାଉରକେଲା ତହସିଲଦାର ବିଶ୍ୱରଞ୍ଜନ ରଥ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିଥିଲେ । ବନ୍ଧମୁଣ୍ଡା କୋଏଲାଗେଟ ନିକଟସ୍ଥ କୁମ୍ଭାରପଡ଼ା ବସ୍ତିରେ ଅନୁପ ପ୍ରଜାପତି ମାଟି କାରିଗର ଭାବେ କାମକରି ପରିବାର ପ୍ରତିପୋଷଣ କରିଥାନ୍ତି ।

ତାଙ୍କ ପତ୍ନୀ ପୂଜା ଦେବୀ ୨ ପୁଅ ଆର୍ଯ୍ୟନ (୬) ଓ ଅନୁରାଗ (୫)ଙ୍କୁ ସ୍କୁଲରେ ଛାଡ଼ିବା ପାଇଁ ଯାଇଥିଲେ । ଉଭୟ ଶିଶୁ ସିଆଇଏସ୍ଏଫ୍ ବ୍ୟାରାକ୍ସ୍ଥିତ ଅଙ୍କୁର ଇଂଲିଶ ମିଡିୟମ୍ ସ୍କୁଲର ଛାତ୍ର । ଉଭୟ ପୁଅଙ୍କୁ ନେଇ ପୂଜା ସ୍କୁଲ ବସ୍ ଅପେକ୍ଷାରେ ଥିଲେ । ଏହି ସମୟରେ ରାଉରକେଲାରୁ ବିଶ୍ରାକୁ ଯାଉଥିବା ‘ରାଜହଂସ’ ନାମକ ବସ୍ ନମ୍ବର ଓଆର-୧୪ ଏକ୍ସ-୧୪୨୬ ସେମାନଙ୍କୁ ଧକ୍କା ଦେଇ ପ୍ରାୟ କିଛି ଦୂର ପର୍ଯ୍ୟନ୍ତ ଘୋଷାରି ନେଇଥିଲା । ତୁରନ୍ତ ଅଞ୍ଚଳବାସୀ ଉକ୍ତ ଆହତମାନଙ୍କୁ ନେଇ ଆଇଜିଏଚ୍ରେ ଭର୍ତ୍ତି କରିଥିଲେ । ଏହି ଦୁର୍ଘଟଣା ଘଟାଇଥିବା ବସ୍କୁ ଲୋକେ ଅଟାକଇ କ୍ଷତିପୂରଣ ଓ ଅନ୍ୟାନ୍ୟ ଦାବି କରିବା ସହ ଟାୟାର ଜାଳି ରାସ୍ତା ଅବରୋଧ କରିଥିଲେ । ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା ।

ଖବର ପାଇ ରାଉରକେଲା ଏସ୍ପି ଡା. ଉମାଶଙ୍କର ଦାଶ ଓ ତହସିଲଦାର ବିଶ୍ୱରଞ୍ଜନ ଦାଶ ସେଠାରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିଥିଲେ । ସ୍ଥାନୀୟ ନବ ଜାଗୃତି ମହିଳା ସମିତିର ଆଶାମଣି ଦାଶଙ୍କ ନେତୃତ୍ୱରେ ଏକ ପ୍ରତିନିଧି ଦଳ କ୍ଷତିପୂରଣ ପାଇଁ ରାଉରକେଲା ଅତିରିକ୍ତ ଜିଲ୍ଲାପାଳଙ୍କୁ ମଧ୍ୟ ଦାବି ଜଣାଇଥିଲେ । ସେହିପରି ଆହତମାନଙ୍କ ସମସ୍ତ ଚିକିତ୍ସା ଖର୍ଚ୍ଚ ପ୍ରଶାସନ ବହନ କରୁ ବୋଲି ସ୍ଥାନୀୟ ଉତ୍ତ୍ୟକ୍ତ ଲୋକେ ଜିଦ୍ ଧରିଥିଲେ । ତେବେ ପ୍ରଶାସନ ପକ୍ଷରୁ ପ୍ରତିଶ୍ରୁତି ମିଳିବା ପରେ ପରିସ୍ଥିତି ଶାନ୍ତ ପଡିଥିଲା ।ଡାକ୍ତରଙ୍କ ସୂଚନା ଅନୁଯାୟୀ ଆର୍ଯ୍ୟନଙ୍କ ଅବସ୍ଥା ସଙ୍କଟାପନ୍ନ ରହିଛି ।