ମଙ୍ଗଳବାର ସକାଳେ ଚେନ୍ନାଇ ବିମାନ ବନ୍ଦରରୁ ବରିଷ୍ଠ ସାମ୍ବାଦିକ ଆର.ଆର.ଗୋପାଲଙ୍କୁ ରାଜଭବନ କର୍ମଚାରୀଙ୍କ ଏତଲା ଭିତ୍ତିରେ ପୁଲିସ ଗିରଫ କରିଛି। ଗୋପାଲ ଚେନ୍ନାଇାରୁ ପୁନେ ଯିବା ଲାଗି ବିମାନ ବନ୍ଦରକୁ ଯାଇଥିବା ବେଳେ ତାଙ୍କର ଗିରଫଦାରୀ ହୋଇଛି।
‘ନକ୍କିରନ୍’ର ଚଳିତ ସଂଖ୍ୟାର ପ୍ରଚ୍ଛଦରେ ରାଜ୍ୟପାଳ ବନଓ୍ଵାରିଲାଲ୍ ପୁରୋହିତ ଓ ଅଭିଯୁକ୍ତ ସହକାରୀ-ପ୍ରାଧ୍ୟାପିକା ନିର୍ମଳା ଦେବୀଙ୍କ ଫଟୋ ପ୍ରକାଶ ପାଇଛି। ‘ନକ୍କିରନ୍’ରେ ପ୍ରକାଶିତ ରିପୋର୍ଟ ଅନୁସାରେ ନିର୍ମଳା-ଦେବୀ ମଦୁରାଇ କାମରାଜ ୟୁନିଭରସିଟି ସହ ଅନୁବନ୍ଧିତ ଏକ କଲେଜର ଛାତ୍ରୀମାନଙ୍କୁ ପ୍ରଭାବିତ କରି ୟୁନଭର୍ସିିଟିର ବରିଷ୍ଠ ଅଧିକାରୀଙ୍କୁ ଯୌନ ସଂସର୍ଗ ପ୍ରଦାନ ଲାଗି ରାଜି କରାଉଥିଲେ।
ଏହି ଘଟଣାର ଏକ ଅଡିଓ କ୍ଳିପ୍ ଧରାପଡ଼ି ସୋସିଆଲ୍ ମିଡିଆରେ ଭାଇରାଲ୍ ହେବା ପରେ ନିର୍ମଳା ଦେବୀ ଗିରଫ ହୋଇଥିଲେ। ରିପୋର୍ଟ ଅନୁସାରେ ନିର୍ମଳା ଦେବୀ ତାମିଲନାଡୁ କ୍ରାଇମବ୍ରାଞ୍ଚ ଜିମାରେ ଥିବା ବେଳେ ୪ ଥର ରାଜ୍ୟପାଳ ପୁରୋହିତଙ୍କୁ ଭେଟିଥିଲେ। ମାତ୍ର ଏହା ପ୍ରଘଟ ହେବା ପରେ ରାଜ୍ୟପାଳ ନିର୍ମଳା ଦେବୀଙ୍କୁ ଚିହ୍ନି ନ ଥିବା ବୟାନ ଦେଇଥିଲେ।
ବରିଷ୍ଠ ସାମ୍ବାଦିକ ଆର.ଆର୍.ଗୋପାଲଙ୍କ ଗିରଫଦାବିକୁ ଡିଏମ୍କେ ଅଧ୍ୟକ୍ଷ ଏମ୍.କେ.ଷ୍ଟାଲିନ ନିନ୍ଦା କରିଛନ୍ତି। ସେ କହିଛନ୍ତି ରାଜ୍ୟରେ ସାମ୍ବାଦିକଙ୍କ କଣ୍ଠରୋଧ କରାଯାଉଛି।
Prasanta Patnaik