ନୂଆଦିଲ୍ଲୀ, ଅଗଷ୍ଟ ୧୨ : ସୀମାରେ ଚୀନ୍ ସହିତ ଲାଗି ରହିଥିବା ଯୁଦ୍ଧ ଭଳି ପରିସ୍ଥିତି ମଧ୍ୟରେ ଭାରତର ତିନିସେନା ସମ୍ପୂର୍ଣ୍ଣ ଭାବରେ ନିଜକୁ ପ୍ରସ୍ତୁତ କରୁଛନ୍ତି । ଭାରତର ତିନି ସେନାକୁ କେନ୍ଦ୍ର ସରକାରଙ୍କ ପକ୍ଷରୁ ମଧ୍ୟ ବିଶେଷ ସହାୟତା ଯୋଗାଇ ଦିଆଯାଉଛି । ଯୁଦ୍ଧ ପାଇଁ ଆବଶ୍ୟକ ପଡୁଥିବା ଅସ୍ତ୍ରଶସ୍ତ୍ର କ୍ରୟ କରିବା ନିମନ୍ତେ କେନ୍ଦ୍ର ସରକାର ପୁଣି ଥରେ ଭାରତର ତିନି ସେନା ବାହିନୀକୁ ତତ୍କାଳ 22 ହଜାର 800 କୋଟି ଟଙ୍କାର ଅର୍ଥ ସହୟତାକୁ ମଞ୍ଜୁରୀ ଦେଇଥିବା ଜଣାପଡିଛି । ଏହି ଅର୍ଥରେ ପ୍ରତିରକ୍ଷା ସାମଗ୍ରୀ କିଣିବାକୁ ଅନୁମୋଦନ କରାଯାଇଛି । କେବଳ ଭାରତୀୟ ବାୟୁସେନା ପାଇଁ 106 ମୌଳିକ ପ୍ରଶିକ୍ଷକ ବିମାନ ସହିତ 8,722.38 କୋଟି ଟଙ୍କା ମଞ୍ଜୁର କରାଯାଇଛି ।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରତିରକ୍ଷା ଅଧିଗ୍ରହଣ ପରିଷଦ ବୈଠକରେ ‘ମେକ୍ ଇନ୍ ଇଣ୍ଡିଆ’କୁ ପ୍ରୋତ୍ସାହିତ କରିବା ପାଇଁ ଆସଲ୍ଟ ରାଇଫଲ ପାଇଁ’ ଥର୍ମାଲ୍ ଇମେଜିଙ୍ଗ୍ ନାଇଟ୍ ସାଇଟ୍’ର ସ୍ୱଦେଶୀ ଡିଜାଇନ୍, ବିକାଶ ଏବଂ ନିର୍ମାଣକୁ ଅନୁମୋଦନ କରାଯାଇଛି । ଭାରତୀୟ ସୀମାରେ ନିୟୋଜିତ ସୈନ୍ୟମାନଙ୍କ ପାଇଁ ଏଗୁଡିକ ଭାରତର ଘରୋଇ ଶିଳ୍ପ ଦ୍ୱାରା ପ୍ରସ୍ତୁତ ହେବ | ଏହା ସୈନ୍ୟମାନଙ୍କୁ ଅନ୍ଧକାର ସମେତ ସମସ୍ତ ପ୍ରକାରର ପାଣିପାଗରେ ଦୀର୍ଘ ଦୂରରୁ ସଠିକ୍ ଲକ୍ଷ୍ୟ ଧାର୍ଯ୍ୟ କରିବାରେ ସାହାଯ୍ୟ କରିବ | ଏହା ଦ୍ୱାରା ରାତ୍ରିର ଘନ ଅନ୍ଧାରରେ ମଧ୍ୟ ଶତୃ ଉପରେ ଆକ୍ରମଣ କରିବାରେ କୌଣସି ଅସୁବିଧା ହେବନି | ଏହା ସହ ଭାରତୀୟ ବାୟୁସୀମାକୁ ସୁରକ୍ଷିତ ରଖୁଥିବା ଏୟାରବୋର୍ନ ଚେତାବନୀ ଏବଂ ନିୟନ୍ତ୍ରଣ ସିଷ୍ଟମ (AWACS) ବିମାନ କିଣିବା ନେଇ ମଧ୍ୟ DAC ବୈଠକରେ ଚୂଡାନ୍ତ ହୋଇଛି |
ପ୍ରତିରକ୍ଷା ଅନୁସନ୍ଧାନ ଏବଂ ବିକାଶ ସଂଗଠନ (DRDO) ଏହି ବିମାନଗୁଡ଼ିକ ପାଇଁ ମିଶନ୍ ସିଷ୍ଟମ୍ ଏବଂ ସବ୍-ସିଷ୍ଟମଗୁଡ଼ିକୁ ସ୍ୱଦେଶୀ ଭାବରେ ଡିଜାଇନ୍ କରିବ |ଏହା DRDO ଦ୍ୱାରା ପ୍ରସ୍ତୁତ ହେବା ପରେ ମୁଖ୍ୟ ପ୍ଲାଟଫର୍ମରେ ଏକୀଭୂତ ହେବ | ଏହି ପ୍ଲାଟଫର୍ମଗୁଡିକ ବିମାନରେ ନିଜେ ନିର୍ଦ୍ଦେଶ ଏବଂ ନିୟନ୍ତ୍ରଣ ଏବଂ ‘ପ୍ରାରମ୍ଭିକ ଚେତାବନୀ’ ପ୍ରଦାନ କରିବ, ଯାହା ଭାରତୀୟ ବାୟୁସେନା (IAF) କୁ ଖୁବ୍ କମ୍ ସମୟ ମଧ୍ୟରେ ଭାରତୀୟ ବାୟୁସୀମା ଆଡକୁ ଆସୁଥିବା ଶତୃ ଦେଶର ସମସ୍ତ ବିପଦକୁ ଚିହ୍ନଟ କରିପାରିବ | ଏହି ପ୍ରଣାଳୀଗୁଡ଼ିକର ବିକାଶ କରାଯିବା ପରେ ଆମ ଦେଶର ବାୟୁସୀମାର ସୁରକ୍ଷା ବ୍ୟାପକ ଭାବେ ବୃଦ୍ଧି ପାଇବ |
ନୌସେନା ପାଇଁ ମଧ୍ୟମ ଦୂରତା ବିଶିଷ୍ଟ ‘ଆଣ୍ଟି-ସବମେରାଇନ ଯୁଦ୍ଧ P-8I’ ବିମାନ କିଣିବାକୁ ମଧ୍ୟ DAC ଅନୁମୋଦନ କରିଛି | ଏହି ବିମାନଗୁଡ଼ିକ ଉପକୂଳ ସୁରକ୍ଷା, ପାଣି ଭିତରେ ଥିବା ବୁଡା ଜାହାଜ ଏବଂ ବାୟୁରେ ଥିବା ସମସ୍ତ ଜାହାଜ ଗୁଡିକ ଉପରେ ନଜର ରଖିବା ସହ ଆବଶ୍ୟକ ସମୟରେ ଏହା ଆକ୍ରମଣ ମଧ୍ୟ କରିପାରେ | ଏହା ସହ ଭାରତୀୟ ତଟରକ୍ଷୀ ବାହିନୀ ପାଇଁ ‘ଟ୍ୱିନ୍ ଇଞ୍ଜିନ୍ ହେଭି ହେଲିକପ୍ଟର (TEHH)’ କ୍ରୟକୁ ମଧ୍ୟ DAC ଅନୁମୋଦନ କରିଛି |ଏହି ବିମାନଗୁଡ଼ିକ ତଟରକ୍ଷୀ ବାହିନୀକୁ ଆତଙ୍କବାଦ ମୁକାବିଲା ତଥା ଉଦ୍ଧାର କାର୍ଯ୍ୟ ପାଇଁ ବିଭିନ୍ନ ମିଶନରେ ସାହାଯ୍ୟ କରିବ ଏବଂ ସମୁଦ୍ର ପଥରେ ଆସୁଥିବା ଆତଙ୍କବାଦକୁ ରୋକିବା ସହ ସମୁଦ୍ର ପଥର ସୁରକ୍ଷା କରିବ ।
Prasanta Patnaik