ଗୁଜୁରାଟରେ ୨ କାର ମଧ୍ୟରେ ମୁହାଁମୁହିଁ ଧକ୍କା: ୫ ମୃତ, ୪ ଗୁରୁତରଙ୍କୁ ହସ୍ପିଟାଲରେ ଭର୍ତ୍ତି

ଅହମଦାବାଦ, ଅଗଷ୍ଟ ୧୭ : ଗୁଜୁରାଟର ଖେଡ଼ା ଜିଲ୍ଲାରେ ଦୁଇଟି କାର ମଧ୍ୟରେ ମୁହାଁମୁହିଁ ଧକ୍କା ହୋଇଛି । ଏଥିରେ ୫ ଜଣଙ୍କର ମୃତ୍ୟୁ ହୋଇଥିବା ବେଳେ ୪ ଜଣ ଲୋକଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି । ଗଣମାଧ୍ୟମର ରିପୋର୍ଟ ଅନୁସାରେ ଖେଡ଼ା ଜିଲ୍ଲାର ନଦୀଆଦରେ ୮ ନମ୍ବର ଜାତୀୟ ରାଜପଥରେ ରବିବାର ରାତି ଏହି ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ।

ଅହମଦାବାଦ ଠାରୁ ଭଦୋଦରାକୁ ସଂଯୋଗ କରୁଥିବା ୮ ନମ୍ବର ଜାତୀୟ ରାଜପଥରେ ୨ଟି କାର ମଧ୍ୟରେ ଧକ୍କା ହେବାରୁ ଘଟଣାସ୍ଥଳରେ ହିଁ ୫ ଜଣଙ୍କର ପ୍ରାଣହାନୀ ଘଟିଛି । ଗୁରୁତରମାନଙ୍କୁ ନଦୀଆଦ ସରକାରୀ ହସ୍ପିଟାଲରେ ଭର୍ତ୍ତି କରାଯାଇଥିବା ପୋଲିସ ସୂଚନା ଦେଇଛି । ଦୁର୍ଘଟଣା ପରେ ସୂଚନା ମିଳିବା ପରେ ଦମକଳ ବାହିନୀ ଘଟଣାସ୍ଥଳକୁ ପହଂଚି ଆହତମାନଙ୍କୁ ଉଦ୍ଧାର କରିଥିଲା ବୋଲି କହିଛନ୍ତି ନଦୀଆଦ ଅଗ୍ନିଶମ ଅଧୀକ୍ଷକ ଦୀକ୍ଷିତ ପଟେଲ । ସେହିପରି ଅହମଦାବାଦରୁ ଘଟଣାସ୍ଥଳକୁ ଆମ୍ବୁଲାନ୍ସ ଓ ପୋଲିସ ପହଂଚିଥିଲେ ।