ରାଉରକେଲା, ୨୮ା୧୧ : କୁଖ୍ୟାତ ଚୋର ଦୀପକ ସିଂକୁ ଆଜି ଛେଣ୍ଡ ପୁଲିସ୍ ଗିରଫ କରି କୋର୍ଟ ଚାଲାଣ କରିଛି । ଦୀପକ ନାଁରେ ପ୍ଲାଣ୍ଟସାଇଟ୍, ଉଦିତନଗର, ଛେଣ୍ଡ, ରାଜଗାଙ୍ଗପୁର ସମେତ ବିଭିନ୍ନ ଥାନାରେ ଚୋରି, ଛିନ୍ତାଇ ଭଳି ବହୁ ସଙ୍ଗୀନ ମାମଲା ରହିଛି । କୋର୍ଟରେ ତାର ଜମିନ ନାକଚ ହୋଇଯିବାରୁ ଦୀପକ ଜେଲ୍ ଯାଇଛି । ହୋଟେଲ ଦୀପ୍ତି ପଛପଟ ଟିମ୍ବର କଲୋନୀରେ ରହୁଥିବା ଦୀପକ ମଟର ସାଇକେଲ ଚୋରି, ମୋବାଇଲ୍ ଓ ସୁନାଚେନ ଛିନ୍ତାଇ ଭଲି ମାମଲାରେ ଜଡିତ ଥିଲା । ଗତ କିଛିଦିନ ତଳେ ଗୋପବନ୍ଧୁପାଲୀ ଫାଣ୍ଡି ଅଧିକାରୀ ଦିଗବିଜୟ ବିଶ୍ୱାଳ ଏକ ବାଇକ୍ ଚୋରି ମାମଲାରେ ତାକୁ ଗିରଫ କରିଥିଲେ ।
ତାକୁ ଜେରା ବେଳେ ଛେଣ୍ଡ ଥାନା ଅଞ୍ଚଳରୁ ମୋବାଇଲ୍ ଚୋରି, ଉଦିତନଗର ଅଞ୍ଚଳରୁ ବାଇକ୍ ଚୋରି ମାମଲାରେ ସମ୍ପୃକ୍ତ ଥିବା ସ୍ୱୀକାର କରିଥିଲା । ତିନି ମାସ ତଳେ ଛେଣ୍ଡ ଥାନା ଅଞ୍ଚଳରୁ ୨ଟି ମୋବାଇଲ୍ ଛିନ୍ତାଇ କରିଥିଲା । ଟିଉସନରୁ ଫେରୁଥିବା ଜଣେ ଛାତ୍ରୀ ଓ ଅନ୍ୟଜଣେ ବ୍ୟକ୍ତି ସାନ୍ଧ୍ୟା ଭ୍ରମଣ କରୁଥିବା ବେଳେ ତାଙ୍କ ହାତରୁ ଦୀପକ ମୋବାଇଲ୍ ଲୁଟି ନେଇଥିଲା । ଏ ସମ୍ପର୍କରେ ଛେଣ୍ଡ ଥାନାରେ ଅଭିଯୋଗ ହେବାରୁ ପୁଲିସ୍ ମୋବାଇଲ୍ ନମ୍ବରକୁ ଟ୍ରାକିଂ କରିଥିଲା । ହାତୀବାରି ଥାନା ଅଞ୍ଚଳର ଏମ୍ଡି ସକିଲ ନାମକ ଜଣେ ୨ଟି ମୋବାଇଲ୍ ଦୀପକ ଠାରୁ କିଣି ବ୍ୟବହାର କରୁଥିବା ଟ୍ରାକିଂ ବେଳେ ଜଣାପଡିଥିଲା ।
ଛେଣ୍ଡ ପୁଲିସ୍ ୨ ମାସ ତଳେ ଏମ୍ଡି ସକିଲକୁ ଗିରଫ କରି କୋର୍ଟ ଚାଲାଣ କରିଥିଲା । ଦୀପକ ଠାରୁ ୨ଟି ଚୋରି ମୋବାଇଲ୍ କିଣିଥିଲା ବୋଲି ପୁଲିସ ନିକଟରେ ସ୍ୱୀକାର କରିଥିଲା । ତେଣୁ ଛେଣ୍ଡ ପୁଲିସ୍ ଦୀପକକୁ ଖୋଜିଥିଲା । କିନ୍ତୁ ସେତେବେଳେ ସେ ଫେରାର୍ ଥିଲା । ତାକୁ ଆଜି ଛେଣ୍ଡ ପୁଲିସ୍ କୋର୍ଟ ଚାଲାଣ କରିଛି । କୋର୍ଟରେ ଦାର ଜାମିନ ନାକଚ ହୋଇଯାଇଛି । ଦୀପକ ନାଁରେ ଉଦିତନଗର ଥାନାରେ ବାଇକ୍ ଚୋରି ଓ ରାଜଗାଙ୍ଗପୁର ଥାନାରେ ମଧ୍ୟ ମାମଲା ରହିଛି ।
Prasanta Patnaik