ରାଉରକେଲା, ୨୪/୧୧ : ବେଦବ୍ୟାସରୁ କାର୍ତ୍ତିକ ବୁଡ ପକାଇ ଘରକୁ ଫେରୁଥିବା ବେଳେ ଗୋଟିଏ ପରିବାରର କାର୍ ଦୁର୍ଘଟଣା ଗ୍ରସ୍ତ ହୋଇଛି । ଏଥିରେ ଜଣେ ସାଇକେଲ ଚାଳକ ଗୁରୁତର ଆହତ ହୋଇଛନ୍ତି । ସେକ୍ଟର-୩ ଥାନା ପୁଲିସ୍ କାରକୁ ଜବତ କରିଛି । ଆହତ ସାଇକେଲ୍ ଚାଳକଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି । କୋଏଲନଗର ଅଞ୍ଚଳରେ ରହୁଥିବା ଜନୈକ ବ୍ୟକ୍ତି ତାଙ୍କ ବୃଦ୍ଧ ପିତା-ମାତା ସମେତ ପିଲୁଛୁଆଙ୍କୁ ଧରି କାର୍ତ୍ତିକ ବୁଡ ପକାଇବା ପାଇଁ ବେଦବ୍ୟାସ ଯାଇଥିଲେ ।
ସେଠାରେ ଡଙ୍ଗା ଭସାଇ ସାରି ରିଂରୋଡ୍ ଟ୍ରାଫିକ୍ ଟାୱାର ଦେଇ ଘରକୁ ଫେରୁଥିଲେ । ସେକ୍ଟର-୨ ସ୍ଥିତ ସହରସେବା କାର୍ଯ୍ୟାଳୟ ରିଂରୋଡରେ ହଠାତ୍ କାର୍ଟି ରାସ୍ତା ଉପରୁ ପ୍ରାୟ ୧୦୦ ଫୁଟ ଡେଇଁ ଏକ ଖାଲରେ ପଡିଥିଲା । ଗାଡି ମାଲିକ ନିଜେ ଗାଡି ଚଳାଉଥିଲେ । ସୌଭାଗ୍ୟବଶତଃ ସେ ଓ ତାଙ୍କ ପରିବାର ଲୋକେ ସାମାନ୍ୟ ଆହତ ହୋଇଛନ୍ତି ।
ଏହି ସମୟରେ ବିଶ୍ରା ବିଜାଡିହି ଅଞ୍ଚଳର ଜନୈକ ଶ୍ରମିକ ଇଲିଆସ୍ ଟିଗା କାରଖାନାରୁ କାମ ସାରି ସେହି ରାସ୍ତା ଦେଇ ଘରକୁ ଫେରୁଥିଲେ । କାର୍ ତାଙ୍କୁ ଧକ୍କା ଦେବାରୁ ଇଲିଆସଙ୍କ ହାତଗୋଡ ଭାଙ୍ଗି ଯାଇଥିବା ଖବର ମିଳିଛି । ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି । ସେକ୍ଟର-୩ ପୁଲିସ୍ ଦୁର୍ଘଟଣାଗ୍ରସ୍ତ କାର୍କୁ ଜବତ କରିଛି ।
Prasanta Patnaik