ଜୟପୁର, ଅଗଷ୍ଟ ୧୬ : କରୋନା ସଂକ୍ରମଣ ଦିନକୁ ଦିନ ଆହୁରି ବଢ଼ିବାରେ ଲାଗିଛି । ଏହି ମହାମାରୀ କବଳରେ ସାଧାରଣ ଲୋକଙ୍କ ଠାରୁ ନ୍ୟାୟାଧୀଶ ପର୍ଯ୍ୟନ୍ତ ଛଟପଟ ହେଉଛନ୍ତି । ବର୍ତ୍ତମାନ ରାଜସ୍ଥାନ ହାଇକୋର୍ଟର ମୁଖ୍ୟ ବିଚାରପତି ଇନ୍ଦ୍ରଜିତ ମହାନ୍ତିଙ୍କୁ କରୋନା ସଂକ୍ରମଣ ହୋଇଛି । ମୁଖ୍ୟମନ୍ତ୍ରୀ ଅଶୋକ ଗହଲୋତ ଏହି ସୂଚନା ଦେଇଛନ୍ତି ।
ଟୁଇଟ କରି ରାଜସ୍ଥାନ ମୁଖ୍ୟମନ୍ତ୍ରୀ ଶ୍ରୀ ଗହଲୋତ କହିଛନ୍ତି, ମୋତେ ଜଣାଅଛି ଯେ, ରାଜସ୍ଥାନ ଉଚ୍ଚ ନ୍ୟାୟାଳୟର ମୁଖ୍ୟ ବିଚାରପତି ଶ୍ରୀ ଇନ୍ଦ୍ରଜିତ ମହାନ୍ତି କରୋନା ସଂକ୍ରମିତ ଅଛନ୍ତି । ତାଙ୍କର ସ୍ୱାସ୍ଥ୍ୟକୁ ନେଇ ମୁଁ ଚିନ୍ତିତ । ତାଙ୍କର ଶୀଘ୍ର ଆଶୁ ଆରୋଗ୍ୟ କାମନା କରୁଛି ବୋଲି ସେ ଉଲ୍ଲେଖ କରିଛନ୍ତି । ମାତ୍ର ମୁଖ୍ୟ ବିଚାରପତି ଶ୍ରୀ ମହାନ୍ତି ଏବାବଦରେ ଗଣମାଧ୍ୟମକୁ ସୂଚନା ଦେଇ ନାହାନ୍ତି ।
ସୂଚନାଯୋଗ୍ୟ, ମୁଖ୍ୟ ବିଚାରପତି ମହାନ୍ତି ଶନିବାର ସକାଳୁ ସ୍ୱାଧୀନତା ଦିବସ ଅବସରରେ ହାଇକୋର୍ଟ ପରିସରରେ ବୃକ୍ଷରୋପଣ କରି ମହାଭିଯାନ ଆରମ୍ଭ କରିଥିଲେ । ଏହି ଅବସରରେ ହାଇକୋର୍ଟର ଅନ୍ୟ ବିଚାରପତି ଓ କର୍ମଚାରୀମାନେ ଉପସ୍ଥିତ ଥିଲେ ।
Prasanta Patnaik