କରୋନା କବଳରେ ରାଜ୍ୟର ୬,୮୨୯ ପୋଲିସ, ୩୩ ଜଣଙ୍କର ମୃତ୍ୟୁ

ଭୁବନେଶ୍ୱର, ଅକ୍ଟୋବର ୦୭ : ମହାମାରୀ କରୋନା ସମୟରେ ଦାୟିତ୍ୱ ନିର୍ବାହ କରି ରାଜ୍ୟ ପୋଲିସରେ ୬ ହଜାର ୮୨୯ଜଣ କର୍ମଚାରୀ କରୋନା ସଂକ୍ରମିତ ହୋଇଥିବା ବେଳେ ୩୩ଜଣଙ୍କର ମୃତ୍ୟୁ ଘଟିଲାଣି । ଗୃହ ବିଭାଗର ରାଜ୍ୟ ମନ୍ତ୍ରୀ ଦିବ୍ୟଶଙ୍କର ମିଶ୍ର ବିଧାନସଭାରେ ଏକ ପ୍ରଶ୍ନରେ ଏହି ଉତ୍ତର ଦେଇଛନ୍ତି। ମାର୍ଚ୍ଚରୁ ସେପ୍ଟେମ୍ବର ମଧ୍ୟରେ ଭୁବନେଶ୍ୱର ୟୁପିଡିରେ ସର୍ବାଧିକ ପୋଲିସ କରୋନା ସଂକ୍ରମିତ ହୋଇଛନ୍ତି।

ଭୁବନେଶ୍ୱର ୟୁପିଡିରେ ୫୫୦ପୋଲିସ ଆକ୍ରାନ୍ତ ହୋଇଥିବା ବେଳେ କଟକରେ ୨୭୭ଜଣ ପୋଲିସ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଗଞ୍ଜାମରେ ୨୬୦, ପୁରୀରେ ୨୫୫ ପୋଲିସ ଆକ୍ରାନ୍ତ ହୋଇଛନ୍ତି। ସେହିଭଳି ଭୁବନେଶ୍ୱରରେ ଥିବା ସପ୍ତମ ବାଟାଲିୟନରେ ୧୪୭ଜଣ ପୋଲିସ କରୋନାରେ ଆକ୍ରାନ୍ତ ହୋଇଛନ୍ତି। ସବୁଠୁ ଭଲ ଖବର ହେଲା ଅର୍ଥନୈତିକ ଅପରାଧ ଶାଖାରେ କୌଣସି ଅଫିସର ଏହି ଭୂତାଣୁ ଦ୍ୱାରା ଆକ୍ରାନ୍ତ ହୋଇନାହାନ୍ତି। ସେହିପରି ଭୁବନେଶ୍ୱର ଥିବା ସିକ୍ୟୁରିଟି ଓ୍ବିଙ୍ଗ୍‌ରେ ୬୮, ସ୍ପେଶାଲ ବ୍ରାଞ୍ଚରେ ୩୪, ଅନୁଗୋଳରେ ୧୨୫, ବାଲେଶ୍ୱର ୧୫୫, କେନ୍ଦ୍ରାପଡ଼ାରେ ୧୧୨ଜଣ ଆକ୍ରାନ୍ତ ହୋଇଛନ୍ତି। ଏହାସହ ମୃତ୍ୟୁ ଘଟିଥିବା ପୋଲିସ କର୍ମଚାରୀଙ୍କ ପରିବାରଙ୍କୁ ୫୦ ଲକ୍ଷ ଟଙ୍କା କ୍ଷତିପୂରଣ ଦେବା ପାଇଁ ରାଜ୍ୟ ସରକାରଙ୍କ ପକ୍ଷରୁ ସମସ୍ତ ପ୍ରକ୍ରିୟା କରାଯାଉଥିବା ମନ୍ତ୍ରୀ ବିଧାନସଭାରେ ଉତ୍ତର ଦେଇଛନ୍ତି।