କନ୍ଧମାଳରେ ଏଏସ୍‌ଆଇଙ୍କୁ ଆକ୍ରମଣ

ଗତକାଲି ରାତିରେ ସଦର ମହକୁମା ସ୍ଥାନୀୟ ବସ୍ ଷ୍ଟାଣ୍ଡ ନିକଟରେ ଥିବା ଏକ ଘରେ ତାଲିମ କାର୍ଯ୍ୟକ୍ରମ ହେବାର ଥିଲା । ସେଠାରେ ଜଣେ ଯୁବକ ପିଅନ ଭାବେ କାମ କରୁଥିଲେ । ଅନ୍ୟ ଜଣେ ଯୁବକ ରାଜୀବ ପ୍ରଧାନଙ୍କ ସହିତ କୌଣସି କାରଣରୁ ତାଙ୍କର ପାଟି ତୁଣ୍ଡ ହୋଇଥିଲା । ସନ୍ଧ୍ୟାରେ ରାଜୀବ ସେଠାରେ ପାଟିତୁଣ୍ଡ କରିବା ସହ ସେହି ଘରର କବାଟ ଓ ଝରକାକୁ ଏକ ଧାରୁଆ ଅସ୍ତ୍ରରେ ଭାଙ୍ଗିବାକୁ ଆରମ୍ଭ କରିଥିଲେ । ଏହା ଦେଖି ସ୍ଥାନୀୟ ଲୋକେ ଟାଉନ୍ ଥାନା ପୋଲିସକୁ ଖବର ଦେବା ପରେ ବସଷ୍ଟାଣ୍ଡରେ ପେଟ୍ରୋଲିଂ କରୁଥିବା ଏଏସ୍‌ଆଇ ଘଟଣା ସ୍ଥଳରେ ପହଁଚିଥିଲେ । ଯୁବକ ଜଣକ ଏଏସ୍‌ଆଇଙ୍କୁ ଆକ୍ରମଣ କରିଥିଲା । ସଙ୍ଗେ ସଙ୍ଗେ ଡ୍ୟୁଟିରେ ଥିବା ଅନ୍ୟ ପୋଲିସମାନେ ସଂପୃକ୍ତ ଯୁବକକୁ କାବୁ କରିଥିଲେ । କନ୍ଧମାଳ ଏସପି ପ୍ରତୀକ ସିଂ ମେଡିକାଲ୍ ଯାଇ ଆହତ ଏଏସ୍‌ଆଇଙ୍କ ସ୍ୱାସ୍ଥ୍ୟ ଅବସ୍ଥା ପଚାରି ବୁଝିଛନ୍ତି ।