ଭୁବନେଶ୍ବର : ରାଜ୍ୟରେ ଓୟୁଏଟି ଓ ଏସ୍ସିବି ମେଡିକାଲ କଲେଜରେ କରୋନା ପରୀକ୍ଷା କରାଯିବ। ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ଜୋରଦାର ଉଦ୍ୟମ ଆରମ୍ଭ ହୋଇଛି। ଆସନ୍ତା ୩/୪ଦିନ ଭିତରେ ଏହି ଦୁଇ ସ୍ଥାନରେ କରୋନା ପରୀକ୍ଷା ନେଇ ପରୀକ୍ଷଣ ଆରମ୍ଭ ହୋଇପାରେ ବୋଲି ଅନୁମାନ କରାଯାଉଛି।
ଅପରପକ୍ଷରେ ଆଜି ଏମ୍ସ ଭୁବନେଶ୍ବରରେ କରୋନା ପରୀକ୍ଷା ଆରମ୍ଭ ହୋଇଛି। ଏହାସହ ଆପୋଲୋ ଭୁବନେଶ୍ବରକୁ ମଧ୍ୟ ଏଥିପାଇଁ ଅନୁମତି ମିଳିସାରିଛି। ମାତ୍ର ସେଠାରେ ଏ ପର୍ଯ୍ୟନ୍ତ ପରୀକ୍ଷା ଆରମ୍ଭ ହୋଇନାହିଁ। ତେଣୁ ଆରଏମ୍ଆରସି, ଏମ୍ସ, ଓୟୁଏଟି ଓ ଏସ୍ସିବିରେ ଯଦି କରୋନା ପରୀକ୍ଷା ଆରମ୍ଭ ହୁଏ ତେବେ ରାଜ୍ୟରେ ଦିନକୁ ୨୦୦ ନମୁନା ପରୀକ୍ଷା ହୋଇପାରିବ ବୋଲି ଆଶା କରାଯାଉଛି। ସୂଚନା ଅନୁସାରେ, ରାଜ୍ୟରେ କରୋନା ସନ୍ଦିଗ୍ଧଙ୍କ ସଂଖ୍ୟା ଦିନକୁ ଦିନ ବଢ଼ୁଥିବା ବେଳେ ଅଧିକ ସଂଖ୍ୟାରେ ପରୀକ୍ଷା କେନ୍ଦ୍ରର ଆବଶ୍ୟକତା ରହିଛି। ଏହି ପରିପ୍ରେକ୍ଷୀରେ ଓୟୁଏଟିର ଭେଟେରେନାରି ମେଡିକାଲ କଲେଜରେ ରହିଥିବା ଅତ୍ୟାଧୁନିକ ଯନ୍ତ୍ରାଂଶ ସହାୟତାରେ ରାଜ୍ୟ ସରକାର କରୋନା ପରୀକ୍ଷା ପାଇଁ ଯୋଜନା କରିଛନ୍ତି। ତେବେ ଏସ୍ସିବି ମେଡିକାଲ କଲେଜରେ କରୋନା ପରୀକ୍ଷା ପାଇଁ ରାଜ୍ୟ ସରକାର ପୂର୍ବରୁ କେନ୍ଦ୍ର ସରକାରଙ୍କୁ ଚିଠି ଲେଖିଥିଲେ। ଆସନ୍ତା ୩/୪ ଦିନ ଭିତରେ ଏହି ଦୁଇ ସ୍ଥାନରେ କରୋନା ପରୀକ୍ଷା ପାଇଁ ପରୀକ୍ଷଣ ଆରମ୍ଭ ହେବ।
ଅପରପକ୍ଷରେ ରାଜଧାନୀର ଆଉ ଏକ ଘରୋଇ ହସ୍ପିଟାଲ କରୋନା ପରୀକ୍ଷା ପାଇଁ ଆବେଦନ କରିଥିବା ସୂଚନା ମିଳିଛି। ଯଦିଓ ସେଠାରେ କରୋନା ପରୀକ୍ଷା ପାଇଁ କୌଣସି ଅନୁମତି ଦିଆଯାଇ ନାହିଁ, ତେବେ ଅନୁମତି ମିଳିଲେ ଏହା ଦ୍ବିତୀୟ ଘରୋଇ ହସ୍ପିଟାଲ ଭାବେ କରୋନା ପରୀକ୍ଷା କରିପାରିବ ବୋଲି ଆଶା କରାଯାଉଛି। ମାତ୍ର ଘରୋଇ ସଂସ୍ଥାମାନେ କରୋନା ପରୀକ୍ଷା ପାଇଁ ସର୍ବାଧିକ ସାଢ଼େ ୪ହଜାର ଟଙ୍କା ରୋଗୀଙ୍କଠାରୁ ନେଇପାରିବେ ବୋଲି କେନ୍ଦ୍ର ସରକାର ସ୍ପଷ୍ଟ କରିଛନ୍ତି।
Prasanta Patnaik