ରାଉରକେଲା, ୨୩ା୧୨ : ରାଉରକେଲା ଓକିଲ ସଘଂ ନିର୍ବାଚନ ଫଳ ପ୍ରକାଶ ପାଇଛି । ଏଥିରେ ରମେଶ ବଳ ସଂଘ ସଭାପତି ଭାବେ ନିର୍ବାଚିତ ହୋଇଥିବା ବେଳେ ସମ୍ପାଦକ ଭାବେ ଅକ୍ଷୟ କୁମାର ସାହୁ ନିର୍ବାଚିତ ହୋଇଛନ୍ତି । ତେବେ ସଂଘର ବିଭିନ୍ନ ପଦବୀ ପାଇଁ ସମୁଦାୟ ୨୫ ଜଣ ପ୍ରାର୍ଥୀ ନିର୍ବାଚନ ଲଢ଼ୁଥିଲେ । ସଂଘର ମୋଟ ୭୭୦ ସଦସ୍ୟଙ୍କ ମଧ୍ୟରୁ ୬୪୬ ଜଣ ୮ଟି ବୁଥ୍ରେ ସେମାନଙ୍କ ମତଦାନ କରିଥିଲେ । ନିର୍ବାଚନ ଅଧିକାରୀ ମହମ୍ମଦ ରଫିକଙ୍କ ତତ୍ତ୍ୱବଧାନରେ ନିର୍ବାଚନ ପ୍ରକ୍ରିୟା ସମ୍ପନ୍ନ ହୋଇଥିଲା । ସଭାପତି ପଦବୀ ପାଇଁ ରମେଶ ବଳ ଓ ପ୍ରଦୀପ ମିଶ୍ର ଲଢ଼ୁଥିଲେ । ଶ୍ରୀ ବଳ ୩୬୬ ଭୋଟ୍ ପଛରେ ପକାଇ ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀଙ୍କୁ ପରାସ୍ତ କରିଛନ୍ତି ।
ରମେଶ ୪୯୮ ଭୋଟ୍ ପାଇଥିବାବେଳେ ପ୍ରଦୀପ ମାତ୍ର ୧୩୨ ଖଣ୍ଡ ଭୋଟ୍ ପାଇଥିଲେ । ସେହଭଳି ଉପସଭାପତି ପଦବୀରେ ରଙ୍ଗବାହାଦୁର ବାଗ ତାଙ୍କ ପ୍ରତିଦ୍ୱନ୍ଦ୍ୱୀ ସୁଶାନ୍ତ ଦାଶଙ୍କୁ ୪୭ ଖଣ୍ଡ ଭୋଟ୍ ପଛରେ ପକାଇ ବିଜୟୀ ହୋଇଛନ୍ତି । ସାଧାରଣ ସମ୍ପାଦକ ପଦବୀରେ ଅକ୍ଷୟ କୁମାର ସାହୁ ୯୩ ଖଣ୍ଡ ଭୋଟରେ ରାଜ କିଶୋର ପ୍ରଧାନଙ୍କୁ ପରାସ୍ତ କରିଛନ୍ତି । କୋଷାଧ୍ୟକ୍ଷ ପଦବୀରେ ଶ୍ରୀନିବାସ ପଣ୍ଡା ତାଙ୍କର ପ୍ରତିଦ୍ୱନ୍ଦ୍ୱୀ ଉପେନ୍ଦ୍ର ବଘାରଙ୍କୁ ୧୯୧ ଖଣ୍ଡ ଭୋଟରେ ପରାସ୍ତ କରିଛନ୍ତି ।
ଏଏସ୍ଏମ୍ ଫଣ୍ଡ ସମ୍ପାଦକ ଦାୟିତ୍ୱ ପାଇଁ ମାଧବୀ ଝା ତାଙ୍କ ପ୍ରତିଦ୍ୱନ୍ଦ୍ୱୀ ଚନ୍ଦ୍ରମଣି ଦାସଙ୍କୁ ୧୩୦ ଭୋଟ୍ରେ ପରାସ୍ତ କରିଛନ୍ତି । ସହସମ୍ପାଦକ ଓ ଲାଇବ୍ରେରୀ ଦାୟିତ୍ୱ ପାଇଁ ଦେବାନନ୍ଦ ତନ୍ତୀ ୪୫ ଭୋଟରେ ମାନସ ରଞ୍ଜନ ପଣ୍ଡାଙ୍କୁ ହରାଇଛନ୍ତି । ୧୦ ବର୍ଷ ଆଇନଜୀବୀ ଅଭ୍ୟାସ ସଦସ୍ୟ ଭାବେ ପଦ୍ମନୀ ଦାସ ୩୭୮ ଖଣ୍ଡ ଭୋଟ ପାଇ ବିଜୟୀ ହୋଇଛନ୍ତି । ଦୁଇଜଣ ମହିଳା ସଦସ୍ୟ ସୌଦାମିନୀ ଜେନା ୩୨୩ ଓ ଅନୁସୂୟା ପଣ୍ଡା ୨୯୦ ଭୋଟରେ ବିଜୟୀ ହୋଇଛନ୍ତି । ଦିଲୀପ ଦାସ, ବଳଭଦ୍ର ନାୟକ, ପି.ସି. ମିଶ୍ର, ଇନ୍ଦ୍ରବିଳାସ ପଟେଲ, ସୌରଭ ଗର୍ଗ, ଅଞ୍ଜୁବାଳା ପ୍ରଧାନ, ପବିତ୍ର ମୋହନ ପ୍ରଧାନ ପରିଚାଳନାରେ ସହଯୋଗ କରିଥିଲେ ।
Prasanta Patnaik