ନୂଆଦିଲ୍ଲୀ : ଦିଲ୍ଲୀ ଦଙ୍ଗା ଓ ଗୁଇନ୍ଦା ବ୍ୟୁରୋ ଅଧିକାରୀ ଅଙ୍କିତ୍ ଶର୍ମାଙ୍କ ହତ୍ୟା ମାମଲାରେ ଅଭିଯୁକ୍ତ ଆମ୍ ଆଦମୀ ପାର୍ଟିର ପୂର୍ବତନ କର୍ପୋରେଟର ତାହିର ହୁସେନଙ୍କ ଭାଇ ଶାହା ଆଲମଙ୍କୁ ଦିଲ୍ଲୀ ପୁଲିସ ଗତକାଲି ଗିରଫ କରିଥିବା ଜଣାଯାଇଛି। ଦିଲ୍ଲୀ ପୁଲିସ କ୍ରାଇମ୍ ବ୍ରାଞ୍ଚ୍ ଟିମ୍ ବିଭିନ୍ନ ସ୍ଥାନରେ ଚଢ଼ଉ କରିବା ପରେ ଶାହା ଆଲମଙ୍କୁ ଗିରଫ କରିଛି। ଶାହା ଆଲମଙ୍କ ସମେତ ୭ଜଣଙ୍କୁ ଗିରଫ କରାଯାଇଥିବାର ସୂଚନା ମିଳିଛି। ଦିଲ୍ଲୀ ହିଂସାରେ ତାହିର ହୁସେନଙ୍କ ଭାଇ ଶାହା ଆଲମ ସାମିଲ ହୋଇଥିବା ନେଇ ବଳିଷ୍ଠ ପ୍ରମାଣ ମିଳିଛି ବୋଲି ଆଗରୁ ଦିଲ୍ଲୀ ପୁଲିସ୍ କହିଛି । ପୁଲିସର ଅନେକ ଟିମ ଶାହା ଆଲମଙ୍କୁ ଖୋଜୁଥିଲା ।
ସୂଚନାଯୋଗ୍ୟ ଯେ, ଆମ ଆଦମୀ ପାର୍ଟିରୁ ନିଲମ୍ବିତ ନେତା ତାହିର ହୁସେନ ଗୁଇନ୍ଦା ବ୍ୟୁରୋ ଅଧିକାରୀ ଅଙ୍କିତ ଶର୍ମାଙ୍କୁ ବର୍ବର ହତ୍ୟା ମାମଲାରେ ମଧ୍ୟ ମୁଖ୍ୟ ଅଭିଯୁକ୍ତ ଅଛନ୍ତି। ଦିଲ୍ଲୀ ହିଂସା ସମୟରେ ସେ ଶତାଧିକ ଦଙ୍ଗାକାରୀଙ୍କୁ ତାଙ୍କର ଏକ ନିର୍ମାଣାଧୀନ ବାସଭବନରେ ରଖାଇଥିଲେ ଏବଂ ସେଠାରେ ହିଂସା ପାଇଁ ବିପୁଳ ସାମଗ୍ରୀ ମହଜୁଦ୍ ରଖାଯାଇଥିଲା।
ଏହାପରେ ନ୍ୟାୟାଳୟ ତାହିର ହୁସେନଙ୍କୁ ସାତ ଦିନିଆ ପୁଲିସ ରିମାଣ୍ଡରେ ପଠାଇ ଦେଇଥିଲେ । ଏହି ରିମାଣ୍ଡ ସମୟରେ ଏସଆଇଟି ତାହିର ହୁସେନଙ୍କୁ ପଚରାଉଚରା କରୁଛି ଏବଂ ଅନେକ ତଥ୍ୟ ହାସଲ କରିସାରିଥିବା ଜଣାଯାଇଛି । ତାହିର ହୁସେନଙ୍କଠାରୁ ଭାଇ ଶାହା ଆଲମ ଦିଲ୍ଲୀ ହିଂସାରେ ସାମିଲ ଥିବାର ପ୍ରମାଣ ପାଇଥିଲା ପୁଲିସ।
Prasanta Patnaik