ଆନ୍ଧ୍ର କବ୍‌ଜାରେ ଓଡ଼ିଶା ଗାଁ

କୋରାପୁଟ , ଡିସେମ୍ବର ୧୧: ଓଡ଼ିଶାର ଗୋଟିଏ ଗାଁକୁ କବ୍‌ଜା କରି ନେଇଛି ଆନ୍ଧ୍ର। ବିବାଦୀୟ କୋଟିଆ ଅଂଚଳର ଏହି ସୀମାନ୍ତ ଗାଁକୁ ପଡ଼ୋଶୀ ରାଜ୍ୟ ତା’ ମାନଚିତ୍ରରେ ସଂପୂର୍ଣ୍ଣ ମିଶାଇ ସାରିଥିଲା ବେଳେ ଓଡ଼ିଶା ବି ଏହି ଗାଁକୁ ଫେରାଇ ଆଣିବାକୁ ଉଦ୍ୟମ କରୁନି। କିନ୍ତୁ କାଗଜପତ୍ର କହୁଛି ଏହି ଗାଁ ଓଡ଼ିଶାର। ଏପରିକି ଏହି ଗାଁର ଜମି କିଣାବିକା ଜୟପୁର ସବ ରେଜିଷ୍ଟାର କାର୍ଯ୍ୟାଳୟରେ ହୋଇଛି। ଏହାର ପ୍ରମାଣ ହାତରେ ଲାଗିବା ପରେ ଏହି ଗାଁକୁ ଫେରାଇ ଆଣିବା ଲାଗି ଦାବି କରିଛି ଆମ କୋଟିଆ ସଂଗଠନ।

କୋରାପୁଟ ଜିଲ୍ଲା ପଟାଙ୍ଗୀ ଥାନା କୋଟିଆ ପଞ୍ଚାୟତର ୨୧ଟି ଗାଁକୁ ନେଇ ଓଡ଼ିଶା ଓ ଆନ୍ଧ୍ର ମଧ୍ୟରେ ବିବାଦ ଚାଲିଛି। ଏଥିନେଇ କୌଣସି ନିଷ୍ପତ୍ତି ହୋଇ ପାରି ନ ଥିଲା ବେଳେ ସ୍ଥିତାବସ୍ଥା ପାଇଁ ଅଦାଲତ ନିର୍ଦ୍ଦେଶ ଦେଇଛନ୍ତି। ଏପଟେ ଏହି ବିବାଦୀୟ ତାଲିକାରେ ଯୋଡି ହୋଇ ଯାଇଛି ଆଉ ଗୋଟିଏ ଗାଁ ଡଙ୍କିନି ୟେଲେଗା ବାଲସା। ବିବାଦୀୟ ନେରେଡିବାଲସା ନିକଟରେ ଥିବା ଏହି ଗାଁ ଏବେ ଆନ୍ଧ୍ର ଅଧୀନରେ ରହିଥିଲେ ମଧ୍ୟ ପ୍ରକୃତରେ ଏହା ଓଡ଼ିଶାର ବୋଲି ପ୍ରମାଣ ମିଳିଛି। ମିଳିଥିବା ଦସ୍ତାବିଜ ଅନୁଯାୟୀ, ଏହି ଗାଁର କଣ୍ଡାପାଲି ତାମନଦଖି ନାମକ ଜଣେ ବ୍ୟକ୍ତି ତାଙ୍କର ୨୧ ଏକର ଜମିକୁ ସାଲୁର ଅଂଚଳର ବିଡିକାଲମ ଚିଙ୍ଗନଦଖିଙ୍କୁ ବିକ୍ରି କରିଥିଲେ। ୩ ଶହ ଟଙ୍କା ନେଇ ସେ ଏହି ଜମି ବିକ୍ରୟ କରିଥିଲା ବେଳେ ଏହାର କାଗଜପତ୍ର ଜୟପୁର ସବରେଜିଷ୍ଟ୍ରାର କାର୍ଯ୍ୟାଳୟରେ ହୋଇଥିଲା। ଏହି କାଗଜରେ ଲେଖା ହୋଇଛି ଯେ, କୋରାପୁଟ ତାଲୁକା ପଟାଙ୍ଗୀ ଥାନା ଅଧୀନରେ ଏହି ଗାଁ ରହିଛି। ୧୯୫୬ ମସିହା ଏପ୍ରିଲ ୧୬ ତାରିଖରେ ହୋଇଥିବା ଏହି ଜମି କିଣାବିକାର ଷ୍ଟାମ୍ପ ପେପରେ ଉଭୟ ପକ୍ଷଙ୍କ ଦସ୍ତଖତ ମଧ୍ୟ କରିଛନ୍ତି।