ନୂଆଦିଲ୍ଲୀ,25 Jan. 2019 : ୭୦ ତମ ସାଧାରଣ ଦିବସ ପୂର୍ବ ସଂଧ୍ୟାରେ ରାଷ୍ଟ୍ରପତି ରାମନାଥ କୋବିନ୍ଦ ଜାତି ଉଦ୍ଦେଶ୍ୟରେ ନିଜର ଅଭିଭାଷଣ ଦେଇ ଆସନ୍ତା ସାଧାରଣ ନିର୍ବାଚନରେ ନିଜର ମତାଧିକାର ସାବ୍ୟସ୍ତ କରି ଦେଶ ଗଠନରେ ସହାୟକ ହେବାକୁ ଆହ୍ଵାନ ଜଣାଇଛନ୍ତି ।ସେ କହିଛନ୍ତି ଯେ ଚଳିତବର୍ଷ ଭାରତର ଜନସାଧାରଣଙ୍କୁ – ଆମ ମଧ୍ୟରୁ ପ୍ରତ୍ୟେକଙ୍କୁ ଆଉ ଏକ ଦାୟିତ୍ୱ ନିର୍ବାହ କରିବାକୁ ଅଛି । ସେଇଟି ହେଲା ସାଧାରଣ ନିର୍ବାଚନରେ ଭୋଟ ଦେଇ ସପ୍ତଦଶ ଲୋକସଭା ଗଠନ କରିବା । ଆମ ଗଣତନ୍ତ୍ରର ବିଚାର ଓ ଆଦର୍ଶ ଏହା ଦ୍ୱାରା ସଂପୂର୍ଣ୍ଣ ଭାବେ ପ୍ରତିପାଦିତ ହେବ । ପ୍ରତି ପାଞ୍ଚବର୍ଷରେ ଥରେ ଆମେ ଯେପରି ଭୋଟ ଦିଅନ୍ତି, ପୁଣି ଥରେ ଏଥର ନିଜର ମତାଧିକାର ସାବ୍ୟସ୍ତ କରିବା । ଏବର୍ଷ ନିର୍ବାଚନରେ ବିଶେଷତ୍ୱ ହେଉଛି ଯେ ଏକବିଂଶ ଶତାବ୍ଦୀରେ ଜନ୍ମଲାଭ କରିଥିବା ଭୋଟରମାନେ ପ୍ରଥମ ଥର ନିଜର ମତଦାନ କରିବାର ସୁଯୋଗ ପାଇବେ ଏବଂ ଏକ ନୂଆ ଲୋକସଭା ଗଠନରେ ସେମାନଙ୍କର ଅଧିକାର ସାବ୍ୟସ୍ତ କରିବେ ।
ସେ କହିଛନ୍ତି ଯେ ଭୋଟଦାନ ଏକ ପବିତ୍ର ଦାୟିତ୍ୱ । ଅତଏବ ମତାଧିକାର ସାବ୍ୟସ୍ତ କରିବାକୁ ସମସ୍ତଙ୍କୁ ଅନୁରୋଧ କରୁଛି । ଭୋଟର କାହାକୁ ଭୋଟଦେବେ ଏହା ସେମାନଙ୍କ ଉପରେ ନିର୍ଭର କରେ । ତେବେ ସବୁ ଯୋଗ୍ୟ ଭୋଟରଙ୍କୁ ମୁଁ ଅନୁରୋଧ କରିବି ଯେ ସେମାନେ ଭୋଟ ଦେବାକୁ ଯାଆନ୍ତୁ ଓ ନିଜର ମତାଧିକାର ସାବ୍ୟସ୍ତ କରନ୍ତୁ । ଆମ ଦେଶ ଏବେ ଏକ ଘଡ଼ିସନ୍ଧି ମୁହୂର୍ତ୍ତ ଦେଇ ଗତି କରୁଛି । ଗୋଟିଏ ଦୃଷ୍ଟିରୁ ଏହା ୧୯୪୦ ଓ ୧୯୫୦ ଦଶକର ପ୍ରଥମ ଭାଗ ଭଳି ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ରଚନାତ୍ମକ । ଆଜିର ନିଷ୍ପତ୍ତି ଓ କାର୍ଯ୍ୟନୁଷ୍ଠାନ ଏକବିଂଶ ଶତାବ୍ଦୀର ଅବଶିଷ୍ଟ ସମୟ ପାଇଁ ଭାରତକୁ ରୂପ ଦେବ । ଅତଏବ ଏହା ଗୋଟିଏ ପିଢ଼ିରେ ଥରେ ଭଳି ସମୟ ନୁହେଁ ବରଂ ଏକ ଶତାବ୍ଦୀରେ ଥରେ ମାତ୍ର ଘଟଣା ।
ଲୋକଙ୍କ ଆଶା ଆକାଙ୍କ୍ଷା ପୂରଣ କରିବା ଏବଂ ଏକ ବିକଶିତ ଭାରତ ଗଠନ କରିବା ଦିଗରେ ଆମର ଯେଉଁ ଯାତ୍ରା ଆରମ୍ଭ ହୋଇଛି ଏହି ନିର୍ବାଚନ ସେଥିରେ ଏକ ମାଇଲଖୁଣ୍ଟ ହେବ । ଭାରତ ପ୍ରଥମଥର ପାଇଁ ତା’ର ଇତିହାସରେ ଉତ୍କଟ ଦାରିଦ୍ର୍ୟର ଅବସାନ ଘଟାଇବା ଦ୍ୱାର ଦେଶରେ ଉପନୀତ ହୋଇଛି । ଏକ ସାର୍ବଜନୀନ ଓ ନ୍ୟାୟସଙ୍ଗତ ସ୍ୱାସ୍ଥ୍ୟସେବା ଯୋଜନା ଆରମ୍ଭ ହେବାକୁ ଯାଉଛି । ଆମ ସମାଜର ଅଧିକରୁ ଅଧିକ ଲୋକ ଏବେ ଔଷଧପତ୍ର, ଚିକିତ୍ସା ସାମଗ୍ରୀ ଆଦି ଶସ୍ତା ଓ ସୁଲଭ ମୂଲ୍ୟରେ ପାଉଛନ୍ତି । ପୂର୍ବାପେକ୍ଷା ଅଧିକ ସଂଖ୍ୟକ ଲୋକ ଆଧୁନିକ ପରିମଳ ବ୍ୟବସ୍ଥା, ବିଜୁଳି ଓ ଅନ୍ୟାନ୍ୟ ମୌଳିକ ସୁବିଧା ଥିବା ଉପଯୁକ୍ତ ଘର ରହିବାକୁ ପାଉଛନ୍ତି ବୋଲି ସେ କହିଛନ୍ତି ।
Prasanta Patnaik