ମୁମ୍ବାଇ: ଚଳିତ ବର୍ଷର ଦିୱାଲି ଉପଲକ୍ଷେ ଗତ ୨୫ ତାରିଖରେ ରିଲିଜ୍ ହୋଇଥିବା ଏବର୍ଷର ଅନ୍ୟତମ ବହୁପ୍ରତୀକ୍ଷିତ ସିନେମା ‘ହାଉସଫୁଲ୍-୪’ ଅବଶେଷରେ ୧୦୦ କୋଟି କ୍ଲବରେ ପହଞ୍ଚିଛି। ମିଳିଥିବା ସୂଚନା ଅନୁଯାୟୀ ଏହା ପାଞ୍ଚ ଦିନରେ ୧୦୦ କୋଟି କ୍ଲବରେ ସାମିଲ ହୋଇଛି। ଅପରପକ୍ଷରେ ‘ହାଉସଫୁଲ୍-୪’ ପ୍ରଥମ ଛଅ ଦିନରେ ୧୨୧.୧୮ କୋଟି ଟଙ୍କା ଆୟ କରିଥିବା ଜଣାଯାଇଛି।
ସୂଚନା ଯୋଗ୍ୟ, ସାଜିଦ୍ ନାଡିଆଡଓ୍ଵାଲାଙ୍କ ପ୍ରଯୋଜିତ ‘ହାଉସଫୁଲ୍-୪’ ପ୍ରଥମ ଦିନ ୧୯.୦୮ କୋଟି ଟଙ୍କା ଆୟ କରି ଅନେକଙ୍କୁ ନିରାଶ କରିଥିଲା।
ଫରହାଦ୍ –ସାମଜି ଏହାର ନିର୍ଦ୍ଦେଶକ। ଏଥିରେ ଅକ୍ଷୟ କୁମାର, ରିତେଶ୍ ଦେଶମୁଖ୍,ବବି ଦେଓଲ୍,ଶରଦ୍ କେଲକର୍,ପୂଜା ହେଗ୍ଡେ,କ୍ରିତି ଖରବନ୍ଦା, କ୍ରିତି ସାନନ୍ , ଚଙ୍କି ପାଣ୍ଡେ ଏବଂ ନୱାଜୁଦ୍ଦିନ ସିଦ୍ଦିକୀ ପ୍ରମୁଖ ମୁଖ୍ୟ ଭୂମିକାରେ ଅଛନ୍ତି।
‘ହାଉସଫୁଲ୍-୪’ ହେଉଛି ୨୦୧୯ରେ ଅକ୍ଷୟ କୁମାରଙ୍କ ରିଲିଜ୍ ହୋଇଥିବା ନୂଆ ସିନେମା। ଏ ବର୍ଷ ଆଗରୁ ତାଙ୍କ ଅଭିନୀତ ‘କେଶରୀ’ ଏବଂ ‘ମିଶନ ମଙ୍ଗଲ’ ରିଲିଜ୍ ହୋଇଥିଲା, ଯାହା ବକ୍ସଅଫିସରେ ଭଲ ପ୍ରଦର୍ଶନ କରିଥିଲା। ଅବଶେଷରେ ‘ହାଉସଫୁଲ୍-୪’ ବି ହିଟ୍ ହୋଇଥିବା ଜଣାଯାଇଛି। ଏହାଫଳରେ ବକ୍ସ ଅଫିସରେ ଅକ୍ଷୟଙ୍କ ଜୟଯାତ୍ରା ଅବ୍ୟାହତ ରହିଛି। ଏଥିଲାଗି ସୁପରଷ୍ଟାର ଅକ୍ଷୟ କୁମାର ନିଜର ପ୍ରଶଂସକମାନଙ୍କୁ ଧନ୍ୟବାଦ ଜଣାଇଛନ୍ତି।
Prasanta Patnaik