ୟୁପିରେ ୭୪ ଆସନ ଜିତିବୁ, ପ୍ରଭୁ ରାମଙ୍କ ଜନ୍ମସ୍ଥାନରେ ହିଁ ଭବ୍ୟ ମନ୍ଦିର ନିର୍ମାଣ ହେବ : ଅମିତ ଶାହ

ନୂଆଦିଲ୍ଲୀ: ୨୦୧୯ ସାଧାରଣ ନିର୍ବାଚନରେ ବିଚାରଧାରାକୁ ନେଇ ଲଢ଼େଇ ହେବ । ଦୁଇଟି ବିଚାରାଧାରା ମଧ୍ୟରେ ଏହି ଲଢ଼େଇରେ ଜନସାଧାରଣ ନିଜ ପ୍ରତିନିଧି ଚୟନ କରିବେ ବୋଲି ବିଜେପି ଅଧ୍ୟକ୍ଷ ଅମିତ ଶାହ କହିଛନ୍ତି।

ଉତ୍ତର ପ୍ରଦେଶ ସଂପର୍କରେ ଦୃଢ଼ୋକ୍ତି ପ୍ରକାଶ କରି ଶାହ କହିଛନ୍ତି ଯେ ବିଜେପି ୟୁପିରେ ୭୩ରୁ ୭୪ ଆସନରେ ବିଜୟୀ ହେବ। ୨୦୧୪ରେ ଆମେ ୭୨ ଆସନ ଦଖଲ କରିଥିଲୁ ଏବଂ ୨୦୧୯ରେ ଏହା ୭୪ ହେବ ବୋଲି ସେ କହିଛନ୍ତି। ଦିଲ୍ଲୀର ରାମଲୀଳା ପଡ଼ିଆରେ ଆଜିଠାରୁ ଆରମ୍ଭ ହୋଇଥିବା ଦୁଇ ଦିନିଆ ଜାତୀୟ ପରିଷଦ ବୈଠକରେ ଉଦ୍‌ବୋଧନ ଦେଇ ଶାହ କହିଛନ୍ତି ଯେ ଉତ୍ତର ପ୍ରଦେଶରେ ବୁଆ (ମାୟାବତୀ)-ବବୁଆ (ଅଖିଳେଶ) ମେଣ୍ଟକୁ ଲୋକେ ପ୍ରତ୍ୟାଖ୍ୟାନ କରିବେ। ପରସ୍ପରର ପରମ ଶତ୍ରୁ ରହି ଆସିଥିବା ଏହି ଦୁଇ ଦଳ ବିଜେପି ଭୟରେ ଏବେ ହାତ ମିଳାଇଛନ୍ତି। ସେମାନଙ୍କୁ ମୋଦୀ ଭୟ ଘାରିଛି ବୋଲି ଶାହ କହିଛନ୍ତି। ପଶ୍ଚିମବଂଗରେ ଏବେ ବିଜେପି ସରକାର ଗଠନ କରିବା ସ୍ଥିତିକୁ ଆସିଯାଇଛି।