ରାଉରକେଲା, ୧୦ା୧୧ : ଉଦିତନଗର କୋର୍ଟ ପରିସରରେ ରାଷ୍ଟ୍ରୀୟ ଆଇନ୍ ସେବା ଦିବସ ପାଳିତ ହୋଇଯାଇଛି । ଏଥିରେ ପାନପୋଷ ତାଲୁକ ଆଇନ୍ ସେବା କମିଟି ଅଧ୍ୟକ୍ଷ ତଥା ଅତିରିକ୍ତ ଜିଲା ଦୌରାଜଜ ରବୀନ୍ଦ୍ର କୁମାର ଦାସ ଯୋଗ ଦେଇ ଦିବସର ତାତ୍ପର୍ଯ୍ୟ ଓ ଆଭିମୁଖ୍ୟ ସମ୍ପର୍କରେ ଉଲ୍ଲେଖ କରିବା ସହ ଉପଯୁକ୍ତ ଆଇନ୍ ସେବା ପ୍ରଦାନ ଉପରେ ଗୁରୁତ୍ୱାରୋପ କରିଥିଲେ । କାର୍ଯ୍ୟକ୍ରମରେ ଅତିରିକ୍ତ ମୁଖ୍ୟ ବିଚାର ବିଭାଗୀୟ ମାଜିଷ୍ଟ୍ରେଟ୍ ନିରଞ୍ଜନ ଜେନା ଯୋଗ ଦେଇ ଆଇନ୍ ସେବାର ବିଭିନ୍ନ ଦିଗ ଉପରେ ଆଲୋଚନା କରିଥିଲେ ।
ବରିଷ୍ଠ ସିଭିଲ ଜଜ ନରେଶ ମହାନ୍ତି ଗରିବ ଲୋକଙ୍କ ପାଇଁ ଥିବା ନିଶୁଳ୍କ ଆଇନ୍ ସେବାର ଦିଗ ଉପରେ ଆଲୋଚନା କରିଥିଲେ । ଉପଖଣ୍ଡ ସ୍ତରୀୟ ବିଚାର ବିଭାଗୀୟ ମାଜିଷ୍ଟ୍ରେଟ୍ ଅଭୟ କୁମାର ଦାସ, ପ୍ରଥମ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ୍, ଦ୍ୱିତୀୟ ଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟ୍ ଓ ସହକାରୀ ଜିଲାପାଳ ଏସ୍.କେ. ବେହେରା କାର୍ଯ୍ୟକ୍ରମରେ ମଞ୍ଚାସୀନ ଥିଲେ । ଆଇନ୍ ସେବା ବିଭାଗର ଆଇନ୍ଜୀବୀ ଅନସୂୟା ପଣ୍ଡା, ପ୍ରମୋଦ ଦେବତା ଓ ପବିତ୍ର ଜେନା ବକ୍ତବ୍ୟ ରଖିଥିଲେ । ଆଇନ୍ ସହାୟକ ପରାମର୍ଶଦାତା ସମସ୍ତ ବିଚାର ବିଭାଗୀୟ ଅଧିକାରୀଙ୍କ ପରିଚୟ ପ୍ରଦାନ ସହ ଧନ୍ୟବାଦ ଦେଇଥିଲେ ।
Prasanta Patnaik