ଭୁବନେଶ୍ବର : ବିଧାନସଭାରେ ଆଜି ସରକାରୀ ସ୍କୁଲଗୁଡିକରେ ଶୌଚାଳୟ ନ ଥିବା ପ୍ରସଙ୍ଗ ଆଲୋଚିତ ହୋଇଛି । ଏ ପ୍ରସଙ୍ଗରେ ଉତ୍ତର ରଖି ଭାରପ୍ରାପ୍ତ ମନ୍ତ୍ରୀ ପଦ୍ମନାଭ ବେହେରା କହିଛନ୍ତି, ୨୦୧୭-୧୮ ତଥ୍ୟ ଅନୁସାରେ ରାଜ୍ୟର ୫୪୨୯୮ଟି ସରକାରୀ ସ୍କୁଲ ରହିଛି । ସେଥିମଧ୍ୟରୁ ୫୩୭୬୩ ଟି ବିଦ୍ୟାଳୟରେ ବାଳିକା ଶୌଚାଳୟ ଓ ୫୨୫୨୧ଟି ବିଦ୍ୟାଳୟରେ ବାଳକ ଶୌଚାଳୟ ରହିଛି । ମୋଟ ୪୪୧ଟି ବାଳିକା ଓ ୧୪୮୫ ବାଳକ ବିଦ୍ୟାଳୟରେ ଶୌଚାଳୟ ନାହିଁ । ଅନ୍ୟପଟେ ସମସ୍ତ ୫୪୨୯୮ଟି ବିଦ୍ୟାଳୟରେ ପାନୀୟ ଜଳ ବ୍ୟବସ୍ଥା ରହିଛି ।
ସମସ୍ତ ବିଦ୍ୟାଳୟରେ ପାଇଖାନା ତଥା ଉତ୍ତମ ପାନୀୟ ଜଳ ଉପଲବ୍ଧ କରାଇବା ପାଇଁ ସରକାର ପ୍ରତିଶ୍ରୁୁତିବଦ୍ଧ ବୋଲି ସୂଚନା ଦେଇଛନ୍ତି ଭାରପ୍ରାପ୍ତ ମନ୍ତ୍ରୀ । କିଛି ବିଦ୍ୟାଳୟରେ ସ୍ଥାୟୀ ପାନୀୟ ଯୋଗାଣ ବ୍ୟବସ୍ଥା ନଥିବାରୁ ସେଠାରେ ମାଠିଆ ଦ୍ୱାରା ପାନୀୟ ଜଳ ଯୋଗାଇବା ପାଇଁ ନିର୍ଦ୍ଦେଶ ଦେଇଛନ୍ତି ସରକାର । ଯେଉଁ ସବୁ ସରକାରୀ ବିଦ୍ୟାଳୟରେ ଶୌଚାଳୟ ନିର୍ମାଣ ହୋଇପାରିନାହିଁ, ସେଠାରେ ଅସ୍ଥାୟୀ ଶୌଚାଳୟ ତିଆରି କରାଯାଇଛି । ବିଦ୍ୟାଳୟରେ ତୁରନ୍ତ ଶୌଚାଳୟ ଓ ପାନୀୟ ଜଳ ବ୍ୟବସ୍ଥା ଯୋଗାଇବା ପାଇଁ ସରକାରଙ୍କ ପକ୍ଷରୁ ପଞ୍ଚାୟତିରାଜ ଓ ପାନୀୟ ଜଳ ବିଭାଗକୁ ନିର୍ଦ୍ଦେଶ ଦିଆଯାଇଛି ।
Prasanta Patnaik