ଭୁବନେଶ୍ବର , ଡିସେମ୍ବର ୦୪: ଧର୍ମେନ୍ଦ୍ର ପ୍ରଧାନ ବିଜେପିର ମୁଖ୍ୟମନ୍ତ୍ରୀ ବୋଲି ଗତ ସପ୍ତାହରେ କହିଥିଲେ କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ୍ ଓରାମ। କିନ୍ତୁ ଜୁଏଲ୍ଙ୍କ ଏହି ମନ୍ତବ୍ୟ ସହ ଏକମତ ହୋଇ ନାହାନ୍ତି ଶ୍ରୀ ପ୍ରଧାନ। ନିର୍ବାଚନ ପରେ ମୁଖ୍ୟମନ୍ତ୍ରୀ ପ୍ରାର୍ଥୀ ବଛାଯିବ ବୋଲି ସେ ଇଙ୍ଗିତ ଦେଇଛନ୍ତି। ଏହି ପ୍ରସଙ୍ଗରେ ସେ ଆଜି ଗଣମାଧ୍ୟମକୁ କହିଛନ୍ତି, ଓଡ଼ିଶାରେ ସାମୂହିକ ନେତୃତ୍ବରେ ଦଳ ଲଢ଼ିବ। ଦଳରେ ଅନେକ ଯୋଗ୍ୟ ବ୍ୟକ୍ତି ଅଛନ୍ତି। ରାଜ୍ୟରେ ଆମେ ସଫଳତା ପାଇଲେ ଓ ପ୍ରମୁଖ ଦଳ ଭାବେ ଉଭା ହେଲା ପରେ ନେତୃତ୍ବ କଥା ଚିନ୍ତା କରାଯିବ।
ଶ୍ରୀ ପ୍ରଧାନ ୨୦୧୯ ସାଧାରଣ ନିର୍ବାଚନରେ ବିଧାନସଭା ଆସନରେ ଲଢ଼ିବାକୁ ଆଗ୍ରହ ଦେଖାଇଛନ୍ତି। ତେବେ ନିର୍ଦ୍ଦିଷ୍ଟ ଭାବେ କେଉଁ ଆସନରେ ଲଢ଼ିବେ, ତାହା ସ୍ପଷ୍ଟ କରି ନାହାନ୍ତି। ପାଲଲହଡ଼ା ଆସନରୁ ତାଙ୍କର ସମ୍ଭାବ୍ୟ ପ୍ରାର୍ଥିତ୍ବକୁ ନେଇ ଏକ ପ୍ରଶ୍ନରେ ସେ କହିଛନ୍ତି, ୧୪୭ ନିର୍ବାଚନମଣ୍ଡଳୀରୁ ଯେ କୌଣସି ସ୍ଥାନରୁ ବିଜେପି ପ୍ରାର୍ଥୀ ହେବା ପାଇଁ ଆଗ୍ରହୀ ଅଛି।
ବିଜୟ ମହାପାତ୍ର ଓ ଦିଲ୍ଲୀପ ରାୟଙ୍କ ଦଳ ଛାଡ଼ିବା ପ୍ରସଙ୍ଗରେ କେନ୍ଦ୍ର ମନ୍ତ୍ରୀ କହିଥିଲେ, ରାଜନୀତିରେ କିଏ କେଉଁଠିକୁ ଯିବ, କାହାକୁ କେହି ରୋକିପାରିବେ ନାହିଁ। ଏହା ନିଜସ୍ବ ବିଷୟ। ପ୍ରସଙ୍ଗ କେବେ ବ୍ୟକ୍ତି ହୁଏ ନାହିଁ। ବିଚାରଧାରା ଓ ଦଳ ହିଁ ସବୁବେଳେ ପ୍ରସଙ୍ଗ ହୋଇଥାଏ। ଅତୀତରେ ବହୁ ଲୋକଙ୍କୁ ସେବା କରିବାର ସୁଯୋଗ ମିଳିଛି, ସେମାନେ ଓଡ଼ିଶାକୁ ପଛକୁ ନେଇଛନ୍ତି। ବିଜେପି ତା’ର ନୀତି, ନେତୃତ୍ବ ଆଧାରରେ ଲୋକମାନଙ୍କ ପାଖକୁ ଯିବ।
Prasanta Patnaik