ବିଜେପିର ଦଳିତ ଭୋଟ୍‌ ବ୍ୟାଙ୍କ ଖସୁଛି!

ଭୁବନେଶ୍ବର, ଜାନୁୟାରୀ ୦୨ : ଏମିତି ତ ବିଜେପି ସ˚ଖ୍ୟାଲଘୁ ଭୋଟର‌୍‌ଙ୍କ ଆସ୍ଥା ଭାଜିତ ହୋଇପାରି ନାହିଁ; ପୁଣି ଏହି ଗୈରିକ ଦଳର ଦଳିତ ଭୋଟ୍‌ ବ୍ୟାଙ୍କ ଅବକ୍ଷୟମୁଖୀ। ନିକଟ ଭବିଷ୍ୟତରେ ଏହି ସମୀକରଣର ତ୍ବରିତ ଉନ୍ନତି ନଜରକୁ ଆସୁ ନଥିବାରୁ ଆସନ୍ନ ଲୋକସଭା ଭୋଟ୍‌ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଜେପି ପାଇଁ କଠୋର ଅଗ୍ନି ପରୀକ୍ଷା ସାବ୍ୟସ୍ତ ହେବ ବୋଲି ରାଜନୈତିକ ପର୍ଯ୍ୟବେକ୍ଷକ ମହଲ ପୂର୍ବାନୁମାନ କରିଛନ୍ତି। ସଦ୍ୟ ସମାପ୍ତ ୫ଟି ବିଧାନସଭା ନିର୍ବାଚନ ଫଳାଫଳକୁ ଆଧାର କରି ଏହି ମହଲ ଦର୍ଶାଇଛନ୍ତି ଯେ ଆଗାମୀ ନିର୍ବାଚନରେ ବିଜେପିର ସ˚ଖ୍ୟାଲଘୁ ଓ ଦଳିତ ଭୋଟ୍‌ ବ୍ୟାଙ୍କ ସ୍ଥିତି ଅଧିକ ଶୋଚନୀୟ ହେବା ଆଶଙ୍କାକୁ ଏଡ଼ାଇ ଦିଆଯାଇ ନପାରେ।

ସୂଚନାଯୋଗ୍ୟ, ବିଜେପି ଗଡ଼ ଭାବେ ବିବେଚିତ ହୋଇ ଆସିଥିବା ହିନ୍ଦୀଭାଷୀ ରାଜସ୍ଥାନ, ମଧୢ ପ୍ରଦେଶ ଓ ଛତିଶଗଡ଼ରେ ଆଦିବାସୀ ଓ ହରିଜନଙ୍କ ପାଇଁ ସ˚ରକ୍ଷିତ ମୋଟ ୧୮୧ ଆସନରୁ ବିଜେପି ୨୦୧୩ ନିର୍ବାଚନରେ ୧୨୯ରେ ବିଜୟୀ ହୋଇଥିଲା। ୨୦୧୮ ଶେଷ ଭାଗରେ ଅନୁଷ୍ଠିତ ନିର୍ବାଚନରେ କ୍ଷମତାଚ୍ୟୁତ ବିଜେପି ସେଥିରୁ ମାତ୍ର ୬୦ଟି ଆସନ ବଞ୍ଚାଇ ପାରିଛି। ରାଜସ୍ଥାନରେ ୫୯ଟି ସ˚ରକ୍ଷିତ ଆସନରୁ ବିଜେପି ପୂର୍ବ ନିର୍ବାଚନରେ ୫୦ଟି ଦଖଲ କରିଥିବା ବେଳେ ଏହି ନିର୍ବାଚନରେ ତାହା ୨୧କୁ ହ୍ରାସ ପାଇଛି। ଅନୁରୂପ ଭାବେ ମଧୢ ପ୍ରଦେଶର ୮୨ଟି ସ˚ରକ୍ଷିତ ଆସନରୁ ବିଜେପି ପୂର୍ବର ୫୯ଟି ଆସନ ପାଇଥିଲା ବେଳେ ଏଥର ପାଇଛି ୩୪ଟି। ଏହି ଧାରାରେ ଛତିଶଗଡ଼ର ୩୯ଟି ସ˚ରକ୍ଷିତ ଆସନରୁ ବିଜେପି ୨୦ଟି ପାଇଥିଲା ବେଳେ ଏଥର ୧୫ଟି ଆସନ ହରାଇ ୫କୁ ଖସିଛି। ଅନୁସୂଚିତ ଜାତି/ଜନଜାତି ନିର୍ଯାତନା ପ୍ରତିରୋଧ ଆଇନର ସ˚ଶୋଧନକୁ ନେଇ ସୂତ୍ରପାତ ଆଇନଗତ ବିବାଦ ଯୋଗୁଁ ବିଜେପି ଦଳିତ ବର୍ଗଙ୍କ ଆସ୍ଥା ହରାଇଥିବା କୁହାଯାଉଛି।

ଉଲ୍ଲେଖଯୋଗ୍ୟ, ୨୦୧୪ ଲୋକସଭା ନିର୍ବାଚନରେ ଏକକ ସ˚ଖ୍ୟାଗରିଷ୍ଠତା ଲାଭ କରିଥିବା ବିଜେପି ଅନୁସୂଚିତ ଜାତି ଓ ଜନଜାତିଙ୍କ ପାଇଁ ସ˚ରକ୍ଷିତ ୮୪ ଓ ୪୭ ଆସନ ମଧୢରୁ ଯଥାକ୍ରମେ ୩୬ଟି ଓ ୩୧ଟି ଆସନ ପାଇଥିଲା। ସେଥିରେ ଓଡ଼ିଶାରୁ ଜୁଏଲ ଓରାମଙ୍କ ରୂପରେ ବିଜେପିର ଏକ ମାତ୍ର ଆସନ ଅନ୍ତର୍ଭୁକ୍ତ। ଅର୍ଥାତ୍‌ ମୋଟ ୧୩୧ ସ˚ରକ୍ଷିତ ଆସନରୁ ବିଜେପିକୁ ମିଳିଥିଲା ୬୭ଟି। ଶ୍ରୀ ଓରାମ ପୁନର୍ବାର ହେଲେ କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ। ହେଲେ ଓଡ଼ିଶା ଜନସ˚ଖ୍ୟାର ୨୩% ଜନଜାତି ଓ ୧୨%ରୁ ଅଧିକ ଅନୁସୂଚିତ ଜାତିଙ୍କ ମନରେ କୌଣସି ଛାପ ଛାଡ଼ିବାରେ ସେ ସକ୍ଷମ ହୋଇପାରି ନାହାନ୍ତି। ମୋଟାମୋଟି ଭାବେ ଓଡ଼ିଶା ସମେତ ଦେଶର ଦଳିତ ବର୍ଗଙ୍କ ମାନସିକତାରେ ବିଜେପି ପ୍ରତି ବିଶେଷ ପରିବର୍ତ୍ତନ ଲକ୍ଷ୍ୟ କରାଯାଉନଥିବାରୁ ୩ ମାସ ପରେ ହେବାକୁ ଥିବା ନିର୍ବାଚନରେ ବିଜେପି ଲୋକସଭାରେ ଏହାର ପୂର୍ବ ସ୍ଥିତି ବଜାୟ ରଖିବା ସମ୍ଭାବନା କ୍ଷୀଣ।