ବାଇକ୍ ଓ ଜେନେରେଟର ଲୁଟ୍ ଅଭିଯୋଗରେ ୪ ଗିରଫ

ରାଉରକେଲା, ୨ା୧୧ : ବିଭିନ୍ନ ଚୋରି ଘଟଣାରେ ଜଡ଼ିତ ୪ ଜଣ ଚୋରଙ୍କୁ ପ୍ଲାଣ୍ଟସାଇଟ୍ ପୁଲିସ ଗିରଫ କରିଛି । ସେମାନଙ୍କ ଠାରୁ ପୁଲିସ ଗୋଟିଏ ବାଇକ୍ ଓ ଜେନେରେଟର ସମେତ ଅନ୍ୟାନ୍ୟ ଚୋରି ସାମଗ୍ରୀ ଜବତ କରିଛି । ଚୋର ଦଳକୁ ପୁଲିସ କୋର୍ଟ ଚାଲାଣ କରିଛି । କୋର୍ଟରେ ସେମାନଙ୍କ ଜାମିନ ଖାରଜ ହୋଇଯାଇଛି । ଟ୍ରାଫିକ ଗେଟ୍ ଅଞ୍ଚଳର ସାଗର ରାୟ (୨୦), ବନ୍ଧମୁଣ୍ଡା କୋଇଲା ଗେଟ୍ର ଅମର ରାମ (୨୩), ବାବୁଲାଲ ଶାହା (୪୦) ଓ ରାଜଗାଙ୍ଗପୁର ଶାନ୍ତିନଗରର ରୋହିତ ବଡ଼ାଇକ (୨୧) ଗତ ଅଗଷ୍ଟ ମାସ ୧୪ ତାରିଖ ଓ ଅକ୍ଟୋବର ୧୦ ତାରିଖରେ ଏକ ଏଲ୍ଇଡି ଟିଭି ଓ ଜେନେରେଟର ଚୋରି କରି ନେଇଥିଲେ । ଏହା ସହିତ ସେମାନେ ବିଶ୍ରା ରୋଡ଼ ଅନ୍ତର୍ଗତ ଚୌଧୁରୀ ପେଟ୍ରୋଲ ପମ୍ପ୍ ନିକଟରୁ ଏକ ମୋଟର ସାଇକେଲ (ଓଡି-୧୪/୧୨୨୭) ମଧ୍ୟ ଚୋରି କରି ନେଇଥିଲେ । ଏହି ତିନିଟି ଚୋରି ଘଟଣାରେ ପୁଲିସ ମାମଲା ରୁଜୁ କରି ଘଟଣାର ତଦନ୍ତ କରୁଥିଲା । ଚାରି ଜଣଙ୍କୁ ପୁଲିସ ଆଜି ଗିରଫ କରି କୋର୍ଟ ଚାଲାଣ କରିଛି । କୋର୍ଟରେ ସେମାନଙ୍କ ଜାମିନ ନାକଚ ହୋଇଯାଇଛି ।