ବସ୍ ଧକ୍କାରେ ଯୁବକ ଗୁରୁତର

ରାଉରକେଲା, ୨୭ା୮: ବସ୍ ଧକ୍କାରେ ଶୀତଳପଡ଼ା ବସ୍ତିର ଜଣେ ଯୁବକ ଗୁରୁତର ଆହତ ହୋଇଛନ୍ତି । ଆହତ ଯୁବକଙ୍କ ନାଁ ସୋନୁ ଲୋହାର । ତାଙ୍କୁ ଚିକିତ୍ସା ପାଇଁ ତାଙ୍କୁ ଆର୍ଜିଏଚ୍ରେ ଭର୍ତ୍ତି କରାଯାଇଛି । ତାଙ୍କ ଅବସ୍ଥା ସଂକଟାପନ୍ନ ଥିବାରୁ ସୋନୁଙ୍କୁ ବୁର୍ଲା ପଠାଇ ଦିଆଯାଇଛି । ଶୀତଳପଡ଼ାରେ ରହୁଥିବା ସୋନୁ ଗତକାଲି ସନ୍ଧ୍ୟାରେ ତା’ର ଜଣେ ସାଙ୍ଗ ସହିତ ଏକ ମୋଟର ସାଇକେଲରେ ଉଦିତନଗର ଆସିଥିଲେ ।

ରିଂ ରୋଡ଼ରୁ ବାହାରି ମହାନଗର ନିଗମ କାର୍ଯ୍ୟାଳୟ ରାସ୍ତାରେ ସେମାନେ ଯାଉଥିବା ବେଳେ ଅନ୍ନପୂର୍ଣ୍ଣା ନାମକ ଏକ ବସ୍ ସେମାନଙ୍କୁ ପଛରୁ ଧକ୍କା ଦେଇଥିଲା । ଏଥିରେ ଦୁହେଁ ମୋଟର ସାଇକେଲରୁ ଛିଟିକି ପଡ଼ିଥିଲେ । ଗାଡ଼ି ପଛରେ ବସିଥିବା ସୋନୁ ମୁଣ୍ଡ ଓ ଦେହର ଅନ୍ୟାନ୍ୟ ଅଂଶରେ ଗୁରୁତର ଆଘାତ ଲାଗିଥିଲା । ତୁରନ୍ତ ଆହତ ସୋନୁଙ୍କୁ ଆର୍ଜିଏଚ୍ରେ ଭର୍ତ୍ତି କରାଯାଇଛି । ମାତ୍ର ଅବସ୍ଥା ସଂକଟାପନ୍ନ ଥିବାରୁ ତାଙ୍କୁ ବୁର୍ଲା ସ୍ଥାନାନ୍ତର କରାଯାଇଛି । ଅନ୍ୟପକ୍ଷରେ ଦୁର୍ଘଟଣା ପରେ ବସ୍ଟି ଫେରାର ହୋଇଯାଇଛି ।