ବଦଳି ତାଲିକା ପ୍ରସ୍ତୁତ: ୫ ସବ୍-ଇନିସ୍ପେକ୍ଟରଙ୍କ ରାଉରକେଲାରୁ ବଦଳି

ରାଉରକେଲା, ୨୦ା୧୨ : ସାଧାରଣ ନିର୍ବାଚନ ପାଇଁ ବିଭିନ୍ନ ପ୍ରସ୍ତୁତି ଜାରି ରହିଛି । ଏହି ପରିପ୍ରେକ୍ଷୀରେ ରାଜ୍ୟ ସ୍ତରର ପୁଲିସ ବିଭାଗରେ ବଡ଼ ଧରଣର ଅଦଳ ବଦଳ କରାଯାଇଛି । ପୁଲିସ ବିଭାଗର ଏହି ଅଦଳବଦଳରେ ୫ ଜଣ ପୁଲିସ ସବ୍ଇନିସ୍ପେକ୍ଟର ରହିଥିବା ବେଳେ ଇନିସ୍ପେକ୍ଟରଙ୍କ ତାଲିକା ମଧ୍ୟ ପ୍ରସ୍ତୁତ ହୋଇଛି । ଚଳିତ ମାସ ଶେଷ ବେଳକୁ ରାଉରକେଲାରେ ୩ ବର୍ଷରୁ ଅଧିକ ସମୟ ଧରି କାମ କରୁଥିବା ଥାନା ଅଧିକାରୀମାନଙ୍କ ବଦଳି ହେବା ଏକ ପ୍ରକାର ନିଶ୍ଚିତ ହୋଇଛି ।

ସୂଚନା ଅନୁସାରେ ଗୋପବନ୍ଧୁପାଲି ଫାଣ୍ଡି ଅଧିକାରୀ ଦିଗ୍ବିଜୟ ବିଶ୍ୱାଳଙ୍କ ରାଉରକେଲାରୁ ଖୋର୍ଦ୍ଧା ପୁଲିସ ଜିଲାକୁ ବଦଳି ହୋଇଛି । ସେହିପରି ରଘୁନାଥପାଲି ଥାନାରେ କାର୍ଯ୍ୟରତ ଏସ୍ଆଇ ମଧୁସୂଦନ ବାଗଙ୍କ ସମ୍ବଲପୁର ବଦଳି ହୋଇଥିବା ବେଳେ ଝିରପାଣି ଥାନା ଏସ୍ଆଇ ଅଶୋକ କୁମାର ଦାସଙ୍କ ଝାରସୁଗୁଡ଼ା ବଦଳି ହୋଇଛି । ଅନୁରୂପ ଭାବେ ଦୟାନିଧି ସାହୁଙ୍କ ସମ୍ବଲପୁର ବଦଳି ହୋଇଥିବା ବେଳେ ବିଜୟ କୁମାର ଦାସଙ୍କ ଭୁବନେଶ୍ୱର କମିଶନରେଟ୍ ପୁଲିସକୁ ବଦଳି ହୋଇଛି ।

ତେବେ ରାଉରକେଲାରେ କାର୍ଯ୍ୟରତ ୪/୫ ଜଣ ଇନିସ୍ପେକ୍ଟରଙ୍କ ବଦଳି ତାଲିକା ପୁଲିସ ମୁଖ୍ୟ କାର୍ଯ୍ୟାଳୟରେ ପ୍ରସ୍ତୁତ ହୋଇଛି । ବଦଳି ହୋଇଥିବା ଇନିସ୍ପେକ୍ଟରମାନଙ୍କ ତାଲିକା ଖୁବ୍ଶୀଘ୍ର ପ୍ରକାଶ ପାଇବ ବୋଲି ଆଲୋଚନା ହେଉଛି । ତେବେ ୩ ବର୍ଷରୁ ଅଧିକ ସମୟ ଧରି କାମ କରୁଥିବା ଅଧିକାରୀମାନଙ୍କୁ ନିର୍ବାଚନ ପୂର୍ବରୁ ବଦଳି କରାଯିବ ବୋଲି ଶୁଣାଯାଉଛି ।