କଂଗ୍ରେସର ପୂର୍ବତନ ବିଧାୟକ କୃଷ୍ଣଚନ୍ଦ୍ର ସଗରିଆ ଖୁଲାସା କରିଥିବା ବିଜେଡ଼ି ଓ କଂଗ୍ରେସର ସଂପର୍କ ବିଜେପିକୁ ଏକ ଶକ୍ତ ମୁଦ୍ଦା ଯୋଗାଇଦେଇଛି । ଯାହାକୁ ଆଜି ପ୍ରସଙ୍ଗ କରି ଗୃହ ଭିତରେ ହଙ୍ଗାମା କରିଛନ୍ତି ବିଜେପି ସଦସ୍ୟମାନେ । ‘ନବୀନ-ନରସିଂହ ଏକ’ ଓ ‘ବିଜେଡ଼ି-କଂଗ୍ରେସ ଭାଇ ଭାଇ’ ସ୍ଲୋଗାନରେ କମ୍ପିଥିଲା ଗୃହ । କୃଷ୍ଣ ସଗରିଆ ଦେଇଥିବା ଚିଠିକୁ ଆଧାର କରି ବିଜେପି ବିଧାୟକ ରବି ନାୟକ, ପ୍ରଦୀପ ପୁରୋହିତ ଓ ରାଧାରାଣୀ ପଣ୍ଡା ପ୍ରମୁଖ ବିରୋଧୀ ଦଳ ନେତା ନରସିଂହ ମିଶ୍ର ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମଧ୍ୟରେ ଥିବା ମଧୁଚନ୍ଦ୍ରିକାକୁ ନେଇ ନାରାବାଜି କରିଥିଲେ ।
ବିରୋଧୀ ଦଳ ନେତାଙ୍କର ଶାସକ ଦଳ ସହିତ ଏମିତି ସଂପର୍କ ଗଣତନ୍ତ୍ର ପାଇଁ ବିପଦ ବୋଲି କହିଥିଲେ । ବିଜେପି ବିଧାୟକମାନେ ଗୃହର ମଧ୍ୟ ଭାଗକୁ ଆସି ହୋହାଲ୍ଲା କରିଥିଲେ । ଅନ୍ୟପକ୍ଷରେ ବିଜେଡ଼ି ସଦସ୍ୟମାନେ ମଧ୍ୟ କେନ୍ଦ୍ର ବିରୋଧରେ ନାରାବାଜି କରିଥିଲେ । ଦୁଇ ଦଳର ସଦସ୍ୟଙ୍କ ହଙ୍ଗାମାରେ ଉଠିଥିଲା ପଡ଼ିଥିଲା ଗୃହ । ଫଳରେ ଗୃହ ଚଳାଇବା ଅସମ୍ଭବ ହେବାରୁ ବାଚସ୍ପତି ପ୍ରଶ୍ନ କାଳକୁ ବାତିଲ କରିଥିଲେ ଏବଂ ସାଢ଼େ ୧୧ଟା ଯାଏଁ ମୁଲତବୀ ଘୋଷଣା କରିଥିଲେ ।
ଗୃହ ମୁଲତବୀ ହେବା ପରେ ବିଧାନସଭା ପରିସରରେ ବିଜେପି ବିଧାୟକମାନେ ଗାନ୍ଧୀ ପ୍ରତିମୂର୍ତ୍ତୀ ତଳେ ଧାରଣା ଦେଇଥିଲେ । ମୁଖ୍ୟମନ୍ତ୍ରୀ, ନରସିଂହ ମିଶ୍ର ଓ ଭୂପିନ୍ଦର ସିଂହଙ୍କ କାର୍ଟୁନ ପୋଷ୍ଟରକୁ ଧରି ଧାରଣା ଦେଇଛନ୍ତି ।
ସେପଟେ ଖାଦ୍ୟ ସୁରକ୍ଷା ଆଇନକୁ ନେଇ କଂଗ୍ରେସ ଆଣିଥିବା ମୁଲତବୀ ପ୍ରସ୍ତାବକୁ ବାଚସ୍ପତି ଗ୍ରହଣ କରିଥିଲେ । ଏହାର ପ୍ରସଙ୍ଗ ରହିଛି ‘ଖାଦ୍ୟ ସୁରକ୍ଷା ବିଫଳ, ଗରିବ ହିତାଧିକାରୀଙ୍କୁ ଅଣଦେଖା କରି ଦଳୀୟ ଭିତିରେ ହିତାଧିକାରୀ ଚୟନ’ । ଏହି ପ୍ରସ୍ତାବ ଉପରେ ଖାଦ୍ୟ ଓ ଯୋଗାଣ ବିଭାଗ ମନ୍ତ୍ରୀ ଉତ୍ତର ରଖିବେ ।