ଦୁର୍ବୃତ୍ତର ଗୁଳି ମାଡରେ ଯୁବକ ଗୁରୁତର

ରାଉରକେଲା, ୧୩/୧୧  : ସାରୁବାହାଲ ଛକ ଠାରେ ଜଣେ ଯୁବକଙ୍କୁ କିଛି ଦୁର୍ବୃତ୍ତ ଗୁଳିମାଡ଼ କରି ଫେରାର ହୋଇଯାଇଛନ୍ତି । ଗୁରୁତର ଆହତ ଅବସ୍ଥାରେ ଯୁବକଙ୍କୁ ଆଇଜିଏଚ୍ରେ ଭର୍ତ୍ତି କରାଯାଇଛି । ସୂଚନା ଅନୁଯାୟୀ, ବିଶ୍ରା ଥାନା ଅନ୍ତର୍ଗତ ବାଲୁଘାଟ ତିତିରିକେଲା ବସ୍ତିରେ ଭରତ ମାହାତୋ (୩୨) ରହନ୍ତି । ସେ ବାଲୁଘାଟ ଅଞ୍ଚଳରେ ସୁପରଭାଇଜର ଭାବେ କାମ କରି ନିଜର ପରିବାର ଭରଣ ପୋଷଣ କରନ୍ତି ।

ଭରତ ଗତକାଲି ବରସୁଆଁ ଖେଳ ପଡ଼ିଆରୁ ଫୁଟବଲ ଖେଳି ଘରକୁ ଫେରୁଥିବା ବେଳେ କିଛି ଦୁର୍ବୃତ୍ତ ତାଙ୍କ ପଛପଟୁ ବାଇକ୍ରେ ଆସି ଗୁଳିକରି ଫେରାର ହୋଇଯାଇଥିଲେ । ଦୁର୍ବୃତ୍ତଙ୍କ ଗୁଳିମାଡ଼ରେ ଭରତ ରାସ୍ତା ଉପରେ ପଡ଼ିଯାଇଥିଲେ । ସ୍ଥାନୀୟ ଲୋକେ ତାଙ୍କୁ ଗୁରୁତର ଆହତ ଅବସ୍ଥାରେ ଉଦ୍ଧାର କରି ଇସ୍ପାତ ଜେନେରାଲ ହସ୍ପପିଟାଲରେ ଚିକିତ୍ସା ପାଇଁ ଭର୍ତ୍ତି କରିଛନ୍ତି । ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଉକ୍ତ ଘଟଣାର ତଦନ୍ତ ଆରମ୍ଭ କରିଛି । ତେବେ ଗୁଳି ମାଡର ପ୍ରକୃତ କାରଣ ସମ୍ପର୍କରେ କିଛି ଜଣାପଡିନାହିଁ ।