ମୁମ୍ବାଇ, ସେପ୍ଟେମ୍ବର ୦୪ : ବଲିଉଡ ଅଭିନେତା ସୁଶାନ୍ତ ସିଂହ ରାଜପୁତ ମୃତ୍ୟୁ ମାମଲାରେ ଡ୍ରଗ୍ସ କାରବାର ଲିଙ୍କ ସାମ୍ନାକୁ ଆସିବା ପରେ ଏନସିବି ଆଜି ସକାଳୁ ରିୟା ଚକ୍ରବର୍ତ୍ତୀଙ୍କ ମୁମ୍ବାଇସ୍ଥିତ ବାସଭବନରେ ଅତର୍କିତ ଭାବେ ଚଢ଼ାଉ କରିଛି । ଏହି ଚଢ଼ାଉରେ ଏନସିବିକୁ ମୁମ୍ବାଇ ପୋଲିସ ସହଯୋଗ କରିଛି । ସୁଶାନ୍ତଙ୍କ ସହଯୋଗୀ ସାମୁଏଲ ମିରାଣ୍ଡଙ୍କ ଘରେ ମଧ୍ୟ ଏନସିବି ପକ୍ଷରୁ ଚଢ଼ାଉ କରାଯାଇଥିବା ଜାତୀୟ ଗଣମାଧ୍ୟମର ରିପୋର୍ଟରୁ ଜଣାଯାଇଛି ।
ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ ଏନସିବିର ଟିମ ଆଜି ସକାଳ ସାଢ଼େ ୬ଟାରେ ରିୟା ଚକ୍ରବର୍ତ୍ତୀଙ୍କ ଘରେ ପହଂଚିଥିଲା । ଏନସିବିର ୫ ଜଣିଆ ଟିମ ରିୟାଙ୍କ ଘର ଭିତରକୁ ପ୍ରବେଶ କରିଛନ୍ତି । ଏନସିବି ସହିତ ମୁମ୍ବାଇ ପୋଲିସର ଉପସ୍ଥିତିରେ ଏହି ଚଢ଼ାଉ ହୋଇଛି । ରିୟାଙ୍କ ଘରେ ସର୍ଚ୍ଚ ଅପରେଶନ ଆରମ୍ଭ ହୋଇଯାଇଛି ।
ସୂଚନାଯୋଗ୍ୟ, ରିୟାଙ୍କ ଭାଇ ଶୋଭିକଙ୍କୁ ଆଜି ପ୍ରବର୍ତ୍ତନ ନିର୍ଦ୍ଦେଶାଳୟ ପଚରାଉଚରା କରିପାରେ । ଏନସିବି ଟିମ ଆଜି ଦୃଢ଼ କାର୍ଯ୍ୟାନୁଷ୍ଠାନ ନେଇପାରେ । ଡ୍ରଗ୍ସ କାରବାର ଘଟଣାରେ ଏନସିବି ଆହୁରି କିଛି ସନ୍ଦିଗ୍ଧଙ୍କୁ ପଚରାଉଚରା କରିପାରେ ।
Prasanta Patnaik