ଟିମ୍ବର କଲୋନୀ ଅଞ୍ଚଳରୁ ଚୋରା ବନ୍ଧୁକ ଜବତ, ଅସାମାଜିକ ଯୁବକ ଗିରଫ

ରାଉରକେଲା, ୨୭/୬ : ଗୋପବନ୍ଧୁପାଲି ପୁଲିସ୍ ଟିମ୍ବର କଲୋନୀ ଅଞ୍ଚଳରୁ ଚୋରା ବନ୍ଧୁକ ଜବତ କରିବା ସହିତ ଜଣେ ଅସାମାଜିକ ଯୁବକକୁ ଗିରଫ କରିଛି । ଗିରଫ ଯୁବକ ହେଲେ ଅମିତ ନନ୍ଦ (୩୫) । କୌଣସି ଅପରାଧ ଘଟାଇବା ପାଇଁ ଅମିତ ଯୋଜନା କରୁଥିବା ବେଳେ ଫାଣ୍ଡି ଅଧିକାରୀ ଦିଗ୍ବିଜୟ ବିଶ୍ୱାଳ ତାକୁ ଗିରଫ କରିଛନ୍ତି ।

ଟିମ୍ବର କଲୋନୀ ଅଞ୍ଚଳରେ ରହୁଥିବା ଅମିତ ଚୋରା ବନ୍ଧୁକ ଏବଂ ଗୁଳି ରଖିଥିବା ଫାଣ୍ଡି ଅଧିକାରୀ ଶ୍ରୀ ବିଶ୍ୱାଳ କୌଣସି ସୂତ୍ରରୁ ଖବର ପାଇଥିଲେ । କାଳବିଳମ୍ବ ନ କରି ଫାଣ୍ଡି ଅଧିକାରୀ ଅମିତକୁ ତା ଘର ନିକଟରୁ କାବୁ କରିଥିଲେ । ଏହି ସମୟରେ ଅନ୍ଧାର ହୋଇଥିବାରୁ ବନ୍ଧୁକରୁ ଗୁଳି ବାହାର କରି ଅମିତ ଫିଙ୍ଗି ଦେଇଥିବା ଅନୁମାନ କରାଯାଉଛି । ଜେରା ବେଳେ ସେ ରାସ୍ତା କଡରୁ ବନ୍ଧୁକ ପାଇଥିବା ପୁଲିସକୁ ସୂଚନା ଦେଇଛି । କିନ୍ତୁ ପୁଲିସ ଏହାକୁ ବିଶ୍ୱାସ କରିପାରୁ ନାହିଁ ।

ତେବେ କୌଣସି ଅପରାଧ ଘଟାଇବା କିମ୍ବା ବିକ୍ରି କରିବା ଉଦ୍ଦେଶ୍ୟରେ ଅମିତ ବନ୍ଧୁକ ରଖିଥିବା ପୁଲିସ୍ ଅନୁମାନ କରୁଛି । ତେବେ ସେ ବନ୍ଧୁକ କେଉଁଠାରୁ ଆଣିଲା ପୁଲିସ ତାର ତଦନ୍ତ କରୁଛି । ଅମିତକୁ ଥାନାରେ ଅଟକ ରଖି ପଚରାଉଚରା କରାଯିବା ସହିତ ସେ କୌଣସି ଅପରାଧରେ ଜଡିତ ଅଛି କି ନାହିଁ ତାହା ପୁଲିସ ତଦନ୍ତ କରୁଛି ।