ନୂଆଗାଁ : ପୂର୍ବ ଶତ୍ରୁତାକୁ କେନ୍ଦ୍ର କରି ଆଜି ଜଣେ ଗ୍ୟାରେଜ୍ ମାଲିକ ଆଉ ଜଣେ ଗ୍ୟାରେଜ୍ ମାଲିକକୁ ରାଜରାସ୍ତା ଉପରେ ବୋଲେରୋ ଚଢ଼ାଇ ଅତି ନୃଶଂସ ଭାବେ ହତ୍ୟା କରିଛି। ଉତ୍ତ୍ୟକ୍ତ ଲୋକେ ଅଭିଯୁକ୍ତର ଗ୍ୟାରେଜ୍ ଭାଙ୍ଗି, ଘରେ ନିଆଁ ଲଗାଇ ଦେବା ସହିତ ଜାତୀୟ ରାଜପଥକୁ ୫ ଘଣ୍ଟା ଧରି ଅବରୋଧ କରିଥିଲେ। ପରିସ୍ଥିତି ନିୟନ୍ତ୍ରଣ ପାଇଁ ନୟାଗଡ଼ ପୁଲିସ୍ ଏବଂ ଅଗ୍ନିଶମ ବାହିନୀ ପହଞ୍ଚି ନାକେଦମ୍ ହୋଇଛନ୍ତି। ଏଭଳି ଏକ ଘଟଣା ନୂଆଗାଁ ଥାନା ମହୀପୁର ଫାଣ୍ତି ଡିମିରିଝରୀ ଗ୍ରାମରେ ଘଟିଛି।
ଘଟଣାରୁ ପ୍ରକାଶ, ଡିମିରିଝରୀ ଗ୍ରାମରେ ଦୁଇଟି ଗ୍ୟାରେଜ୍ ଲାଗି ଲାଗି ରହିଛି। ଗୋଟିଏ ଜଗନ୍ନାଥ ପ୍ରଧାନଙ୍କର ହୋଇଥିବା ବେଳେ ଆଉ ଗୋଟିଏ ଗ୍ୟାରେଜ୍ ବ୍ରଜ ସାହୁଙ୍କର ବୋଲି ଜଣାପଡ଼ିଛି। କିଛିଦିନ ତଳେ ଅଟୋ ମରାମତି କରିବାକୁ ନେଇ ଉଭୟଙ୍କ ମଧ୍ୟରେ ଗଣ୍ତଗୋଳ ହୋଇଥିଲା। ରାଗରେ ଥିବା ବ୍ରଜ ସାହୁ ଜଗନ୍ନାଥ ପ୍ରଧାନଙ୍କ ଗ୍ୟାରେଜକୁ ନିଆଁ ଲଗାଇ ପୋଡ଼ି ଦେଇଥିଲେ। ଏହି ଘଟଣାରେ ବ୍ରଜ ସାହୁ ଜେଲ୍ ଯାଇଥିଲେ। ଜେଲ୍ରୁ ମୁକୁଳିବା ପରେ ପୁଣି ଉଭୟଙ୍କ ମଧ୍ୟରେ ତିକ୍ତତା ଲାଗି ରହିଥିଲା। କିଛିଦିନ ପୂର୍ବେ ଜଗନ୍ନାଥ ପ୍ରଧାନଙ୍କ ଚାରି ବର୍ଷର ଝିଅ ଉପରେ ଗାଡ଼ି ଚପାଇ ଦେବାରୁ ତା’ର ଗୋଟିଏ ଗୋଡ଼ ଭାଙ୍ଗି ଯାଇଥିଲା। ଏମିତି ବ୍ରଜ ଜଗନ୍ନାଥକୁ ହତ୍ୟା କରିବାକୁ ସୁଯୋଗ ଖୋଜି ଆସୁଥିଲା। ଆଜି ଜଗନ୍ନାଥ ନିଜ ଘରୁ ବାହାରି ଗ୍ୟାରେଜ୍କୁ ଚାଲିଚାଲି ରାସ୍ତାରେ ଆସୁଥିବା ବ୍ରଜ ଦେଖିଥିଲା। ବ୍ରଜ ଗ୍ୟାରେଜ୍ରୁ ବୋଲେରୋ (ଓଆର୍ ୦୨ ଏଆର୍୪୬୪୬) ଧରି ଦ୍ରୁତ ଗତିରେ ଆସି ଜଗନ୍ନାଥ ଉପରେ ଚଢ଼ାଇ ଦେଇଥିଲା। ରକ୍ତ ଜୁଡୁବୁଡୁ ଅବସ୍ଥାରେ ଛଟପଟ ହୋଇ ଘଟଣାସ୍ଥଳରେ ଜଗନ୍ନାଥଙ୍କ ମୃତ୍ୟୁ ହୋଇଥିଲା। ଏହି ଘଟଣା ଜଗନ୍ନାଥଙ୍କ ସ୍ତ୍ରୀ ଜ୍ୟୋତିର୍ମୟୀ ସାହୁ ଏବଂ ମାଆ ଠିଆ ହୋଇ ଦେଖିବାକୁ ପାଇଥିଲେ। କିନ୍ତୁ ଗାଡ଼ି ତାଙ୍କ ପିଛା କରି ଯାଉଥିଲେ ମଧ୍ୟ ଜଗନ୍ନାଥଙ୍କୁ ସୂଚନା ଦେବା ପୂର୍ବରୁ ଗାଡ଼ି ତାଙ୍କୁ ଚପାଇ ଦେଇଥିଲା। ଗାଡ଼ି ଚଢ଼ାଇ ଦେବା ପରେ ବ୍ରଜ ନୟାଗଡ଼ ଆଡ଼କୁ ଦ୍ରୁତ ଗତିରେ ଚାଲିଯାଇଥିଲା ଏବଂ ନୟାଗଡ଼ ସଦରଥାନାରେ ପହଞ୍ଚି ଆତ୍ମସମର୍ପଣ କରିଥିବା ପୁଲିସ୍ କହିଛି। ଏହି ଘଟଣାରେ ଉତ୍ତ୍ୟକ୍ତ ଲୋକେ ବ୍ରଜଙ୍କ ଗ୍ୟାରେଜ୍ ଭାଙ୍ଗି ଦେଇଥିବା ବେଳେ ନିଆଁ ଲଗାଇ ଘର ପୋଡ଼ି ଦେଇଛନ୍ତି।
Prasanta Patnaik