କଶ୍ମୀର : ରବିବାର ଦିନ ନିରାପତ୍ତା ବଳ ବଡ଼ଗାମ୍ରେ ଏକ ଆତଙ୍କବାଦୀ ଆଡ୍ଡା ଉପରେ ଚଢ଼ାଉ କରି ୪ଜଣ ଆତଙ୍କବାଦୀଙ୍କୁ ଗିରଫ କରିଛି। ଏହି ଆଡ୍ଡାର ଆତଙ୍କବାଦୀମାନେ ‘ଅନ୍ସାରୁଲ୍-ଗାଜଓ୍ଵାତୁଲ୍ ହିନ୍ଦ୍’ ନାମକ ଆତଙ୍କବାଦୀ ସଙ୍ଗଠନ ସହ ଅନୁବନ୍ଧିତ ବୋଲି ଜଣାପଡ଼ିଛି।
ବିଶେଷସୂତ୍ରରୁ ଖବର ପାଇ ବଡ଼ଗାମ ପୁଲିସ ରାଷ୍ଟ୍ରୀୟ ରାଇଫଲ୍ ସହାୟତାରେ ଏହି ଗୁପ୍ତ ଆଡ୍ଡା ଉପରେ ଚଢ଼ାଉ କରିଥିଲା। ସେଠାରୁ ଆତଙ୍କବାଦୀମାନଙ୍କୁ ଧରି ସେମାନଙ୍କୁ ପାଖରୁ ଅସ୍ତ୍ରଶସ୍ତ୍ର ଓ ଗୋଳାବାରୁଦ ଉଦ୍ଧାର କରାଯାଇଛି। ଏହି ଆତଙ୍କବାଦୀମାନେ ‘ଅନ୍ସାରୁଲ୍-ଗଜଓ୍ଵାତୁଲ୍’ର ଆତଙ୍କବାଦୀଙ୍କୁ ଆଶ୍ରୟ ଦେବା ସହ ସେମାନଙ୍କ ପରିବହନ ଲାଗି ବ୍ୟବସ୍ଥା କରୁଥିଲେ।
ଧରାପଡ଼ିଥିବା ଚାରି ଆତଙ୍କବାଦୀ ହେଉଛନ୍ତି କନିହାମା ବାସିନ୍ଦା ମିର୍ ମୁଜାମିଲ୍ ନବି ଓ ଉମର ଆଜାର ଆହଙ୍ଗର୍ ଏବଂ କାନ୍ତେବାଗ୍ର ବାସିନ୍ଦା ରୌଫ୍ ଅହମଦ୍ ଭଟ ଓ ଇଶ୍ଫକ୍ ଅହମଦ୍ ଭଟ।
ରବିବାର ଦିନ ଏମାନଙ୍କ ପୂର୍ବରୁ ଗନ୍ଦେରବାଲ ପୁଲିସ ଓ ରାଷ୍ଟ୍ରୀୟ ରାଇଫଲ୍ ଲଶ୍କର୍-ଏ-ତୈବାର ଜଣେ ଆତଙ୍କବାଦୀକୁ ଗିରଫ କରିଥିଲେ। ଗିରଫ ଆତଙ୍କବାଦୀ ପାଖରୁ ଏକ ଚୀନ୍ ନିର୍ମିତ ଗ୍ରେନେଡ୍ ମଧ୍ୟ ଉଦ୍ଧାର କରାଯାଇଥିଲା।
Prasanta Patnaik