166 Views
ଭୁବନେଶ୍ୱର, ଅକ୍ଟୋବର ୧୫ : ସିଂହବାହିନୀ ଜଗତଜନନୀ ମା’ ଦୂର୍ଗା ଆଜି ଧରାବତରଣ କରିଛନ୍ତି । ଆଜି ପୂଜା ମଣ୍ଡପରେ ମା’ଙ୍କ ଷଷ୍ଠୀ ପୂଜା ଏବଂ ପୀଠରେ ସପ୍ତମୀ । ମା’ ମଂହିସାଶୂର ମର୍ଦ୍ଦିନୀଙ୍କର ବେଲବରଣ ନୀତି ଅନୁଷ୍ଠିତ ହେଉଛି । ମା’ଙ୍କ ଆଗମାନ ପାଇଁ ପଲ୍ଲୀଠାରୁ ଦିଲ୍ଲୀ ପର୍ଯ୍ୟନ୍ତ ଉତ୍ସବ ମୁଖର ହୋଇପଡ଼ିଛି । ରାଜ୍ୟ ତମାମ ସବୁ ପୂଜା ମଣ୍ଡପ ଚଳଚଂଚଳ ହୋଇ ପଡ଼ିଛି । ମା’ଙ୍କ ଆବାହନ ପାଇଁ ଚାଲିଛି ସ୍ୱତନ୍ତ୍ର ନୀତିକାନ୍ତି । ସ୍ୱାଗତ ପାଇଁ ଅପେକ୍ଷା କରିଛି ପୂଜା ମଣ୍ଡପ ।
ରାଜ୍ୟର ବଡ଼ ବଡ଼ ସହର କଟକ, ଭୁବନେଶ୍ୱର, ରାଉରକେଲା, ସମ୍ବଲପୁର, ବ୍ରହ୍ମପୁରଠାରୁ ଆରମ୍ଭ କରି ପୁରପଲ୍ଲୀର କୋଣ ଅନୁକୋଣରେ ଲୋକଙ୍କ ମଧ୍ୟରେ ନାହିଁ ନ ଥିବା ଉତ୍ସାହ ଦେଖିବାକୁ ମିଳିଛି । ସମସ୍ତେ ମା’ଙ୍କ ଆଗମନ ପାଇଁ ପ୍ରସ୍ତୁତିରେ ଲାଗିପଡ଼ିଛନ୍ତି । ସମସ୍ତ ପୂଜା ମଣ୍ଡପ ଗୁଡ଼ିକରେ ନାଲିନେଳି ଆଲୋକମାଳାରେ ସୁସଜ୍ଜିତ ତୋରଣ ଆଖି ଝଲସାଇ ଦେଉଛି । ସୁଉଚ୍ଚ ତୋରଣ ସାଙ୍ଗକୁ ମୀନା ବଜାର ଓ ଭଳିକି ଭଳି ଖାଦ୍ୟ ଲୋକଙ୍କୁ ଆକୃଷ୍ଟ କରୁଛି ।
କଟକରେ ୧୭୨ ଓ ଭୁବନେଶ୍ୱରରେ ୧୯୨ଟି ପୂଜା ମଣ୍ଡପରେ ମା’ଙ୍କ ଆରାଧନା କରାଯାଉଛି । ଲୋକମାନେ କିଭଳିଭାବେ ଶାନ୍ତି ଶୃଙ୍ଖଳାରେ ଦର୍ଶନ କରିବେ ସେଥିଲାଗି ଟ୍ୱିନ୍ ସିଟିରେ ସୁରକ୍ଷା ଓ ଟ୍ରାଫିକ୍ ବ୍ୟବସ୍ଥାକୁ କଡ଼ାକଡ଼ି କରାଯାଇଛି । କଟକରେ ୪୫ ପ୍ଲାଟୁନ୍ ପୁଲିସ ଫୋର୍ସ ଓ ଭୁବନେଶ୍ୱରରେ ୩୫ ପ୍ଲାଟୁନ ଫୋର୍ସ ମୁତୟନ କରାଯିବ ବୋଲି କମିଶନରେଟ୍ ପୋଲିସ ପକ୍ଷରୁ କୁହାଯାଇଛି । ଏହା ସହିତ କଟକରେ ୩୫୦ ଓ ଭୁବନେଶ୍ୱରେ ୨୦୦ ଅଫିସର୍ ଦାୟିତ୍ୱ ନେଇଛନ୍ତି ।
Prasanta Patnaik