ହିଞ୍ଜିଳିକାଟୁ, ଜାନୁଆରୀ୨୮ : ଗ୍ୟାସ ଏଜେନ୍ସି କରାଇ ଦେବାପାଇଁ ଏକ ବଡ଼ଧରଣର ଚଞ୍ଚକତା ଧରାପଡ଼ିଛି। କେନ୍ଦ୍ରମନ୍ତ୍ରୀଙ୍କ ଦସ୍ତଖତ ସମ୍ବଳିତ ପ୍ୟାଡ୍ ଦେଖାଇ ୪ ଲକ୍ଷ ୮୦ ହଜାର ଟଙ୍କା ଠକାଯାଇଛି। ଏ ସମ୍ପର୍କରେ ଅଭିଯୋଗ ପରେ ପୁଲିସ୍ ପ୍ୟାଡ୍ ଜବତ କରିବା ସହିତ ୬ ଜଣଙ୍କୁ ଗିରଫ କରିଛି।
ଗିରଫ ବ୍ୟକ୍ତି ମାନେ ହେଲେ ବ୍ରହ୍ମପୁର ଶାସ୍ତ୍ରୀନଗରର ମନୋଜ କୁମାର ଶତପଥୀ, ଆସିକାର ବସନ୍ତ କୁମାର ସାହୁ, ବ୍ରହ୍ମପୁର ଆଙ୍କୋଲିର ବିଦ୍ୟାଧର ପଣ୍ଡା, ବ୍ରହ୍ମପୁର ଷ୍ଟେସନ ରୋଡର କୃଷ୍ଣ ବିଶ୍ବାଳ, ରମେଶ ପାତ୍ର ଓ କଟକ ଜିଲ୍ଲା ତୁଳସୀପୁରର ଜିବିତେଶ ମହାନ୍ତି। ଏମାନେ ସମସ୍ତେ ଅଟୋ ଡ୍ରାଇଭର, ରାଜମିସ୍ତ୍ରୀ ଓ ଶ୍ରମିକ ଶ୍ରେଣୀର ବୋଲି ଜଣାପଡ଼ିଛି। ସେମାନଙ୍କଠୁ ଏକ କ୍ବାଲିସ ଗାଡ଼ି (ଓଆର-୦୨ଓଏ-୧୧୧୧) ଓ ନକଲି ଲେଟର ପ୍ୟାଡ୍ ଜବତ ହୋଇଛି। ଏନେଇ ହିଞ୍ଜିଳିକାଟୁ ଥାନାରେ କେସ ନମ୍ବର ୨୮ ଓ ୨୯ ଅନୁସାରେ ୨ଟି ମାମଲା ରୁଜୁ ହୋଇଥିବା ବେଳେ ଏହା ପଛରେ ଏକ ହାଇପ୍ରୋଫାଇଲ୍ ରୢାକେଟ୍ କାମ କରୁଛି। ଯାହାର ମାଷ୍ଟରମାଇଣ୍ଡ ଥାନା ଇଲାକାର ବୋଲି ଅନୁମାନ କରାଯାଉଛି।
ଗତ ୧୪ ତାରିଖରେ ରେଜିଷ୍ଟ୍ରି ଡାକ ଯୋଗେ ଅଜିତଙ୍କ ପାଖକୁ ଏକ ଚିଠି ଆସିଥିଲା। ଏଥିରେ ଇଣ୍ଡିଆନ ଅଏଲ୍ କଂପାନିର ଆପ୍ରୁଭାଲ ଲେଟର୍ ରହିଥିବା ବେଳେ ଏହାକୁ ଧରି ଅଜିତ ଭୁବନେଶ୍ବରସ୍ଥିତ କାର୍ଯ୍ୟାଳୟକୁ ଯାଇଥିଲେ। ସବୁ ବୁଝାସୁଝା କରିବା ପରେ ସମସ୍ତ ବିଷୟ ଓ ତଥ୍ୟ ମିଥ୍ୟା ବୋଲି ଜାଣିବାକୁ ପାଇଥିଲେ। ଆଉ ଏକ ଚିଠିରେ ୨୫ ତାରିଖ ଦିନ ସ୍ଥାନ ନିରୁପଣ ହେବ ବୋଲି ଦର୍ଶାଯାଇଥିଲା। ଫଳରେ ଗତ ୨୫ ତାରିଖରେ ଉକ୍ତ ୬ଜଣ ହିଞ୍ଜିଳିକାଟୁରେ ପହଞ୍ଚିବା କ୍ଷଣି ଅଜିତ ସ୍ଥାନୀୟ ଲୋକଙ୍କ ସହାୟତାରେ ସେମାନଙ୍କୁ କାବୁ କରି ଥାନାରେ ଜିମା ଦେଇ ଥିଲେ। ପୁଲିସ ୬ଜଣକୁ କୋର୍ଟଚାଲାଣ କରିଥିବା ବେଳେ ଏହି ରୢାକେଟ ପଛର ମାଷ୍ଟରମାଇଣ୍ଡକୁ ଧରିବାକୁ ଅଭିଯାନ ଆରମ୍ଭ କରିଛି।
Prasanta Patnaik