ନୂଆଦିଲ୍ଲୀ : ସଂପ୍ରତି ଘୋର ଆର୍ଥିକ ସଙ୍କଟର ସମ୍ମୁଖୀନ ହୋଇ କେନ୍ଦ୍ର ସରକାରଙ୍କ ପାଇଁ ଚିନ୍ତାର କାରଣ ପାଲଟିଛି ରାଷ୍ଟ୍ରାୟତ୍ତ ଏୟାର ଇଣ୍ଡିଆ। ତେଣୁ, ଏୟାର ଇଣ୍ଡିଆ କର୍ତ୍ତୃପକ୍ଷ ଏବେ ଆରମ୍ଭ କରିଛନ୍ତି ଖର୍ଚ୍ଚକାଟ୍ ଯୋଜନା। ଏହି ଯୋଜନାରେ ପ୍ରଥମ ପଦକ୍ଷେପ ସ୍ୱରୂପ ଏୟାର ଇଣ୍ଡିଆର ପରିଚାଳନା କର୍ତ୍ତୃପକ୍ଷ ବିମାନ ମଧ୍ୟରେ କ୍ର୍ୟୁମାନଙ୍କୁ ପ୍ରଦାନ କରାଯାଉଥିବା ଖାଦ୍ୟରେ ପରିବର୍ତ୍ତନ କରି ଏଣିକି ସେମାନଙ୍କୁ ବ୍ୟୟବହୁଳ ଗରିଷ୍ଠ ଖାଦ୍ୟ ବଦଳରେ ସ୍ୱତନ୍ତ୍ର ‘ଲୋ-ଫ୍ୟାଟ୍’ ଖାଦ୍ୟ ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି।
ଏଣିକି ଉଭୟ ଜାତୀୟ ଓ ଅନ୍ତର୍ଜାତୀୟ ରୁଟ୍ରେ ଉଡ଼ାଣ ଭରୁଥିବା ଏୟାର ଇଣ୍ଡିଆର ବିମାନ କ୍ର୍ୟୁମାନଙ୍କୁ ଆଉ ଦାମିକା ଆମିଷ ଖାଦ୍ୟ ପ୍ରଦାନ କରାଯିବ ନାହିଁ। ଏହା ବଦଳରେ ସେମାନଙ୍କୁ କମ୍ ମୂଲ୍ୟର ସ୍ୱାସ୍ଥ୍ୟ ଅନୁକୂଳ ନିରାମିଷ ଖାଦ୍ୟ ପ୍ରଦାନ କରାଯିବ। ଏସଂପର୍କରେ ସୂଚନା ପ୍ରଦାନ କରି ଏୟାର ଇଣ୍ଡିଆର ପ୍ରବକ୍ତା ଧନଞ୍ଜୟ କୁମାର କହିଛନ୍ତି ଯେ ବିମାନ କ୍ର୍ୟୁମାନଙ୍କର ସ୍ୱାସ୍ଥ୍ୟକୁ ଦୃଷ୍ଟିରେ ରଖି ଏୟାର ଇଣ୍ଡିଆ କର୍ତ୍ତୃପକ୍ଷ ଏପରି ନିଷ୍ପତ୍ତି ନେଇଛନ୍ତି।
Prasanta Patnaik