ଅହମ୍ମଦାବାଦ: ନୂଆ ମଟରଯାନ ନିୟମ ଲାଗୁ ହେବା ପରେ ଜୋରଦାର ହେଉଛି ଟ୍ରାଫିକ ଚେକିଂ । ନିୟମ ଉଲ୍ଲଂଘନକାରୀଙ୍କୁ ଜରିମାନା ବାବଦକୁ ହଜାର ହଜାର ଟଙ୍କା ଗଣିବାକୁ ପଡୁଛି । ତେବେ ନୂଆ ନିୟମ ଆସିବାର କିଛି ମାସ ମଧ୍ୟରେ ଟ୍ରାଫିକ ପୁଲିସର ମନମାନିକୁ ନେଇ ଆସିଛି ବଡ ଅଭିଯୋଗ । ନିକଟରେ ଚଣ୍ଡିଗଡ ପୁଲିସ ଜଣେ କାର ଚାଳକଙ୍କ ଠାରୁ ମୋଟା ଅଙ୍କର ଜରିମାନା ଆଦାୟ କରିଥିବାର ସୂଚନା ମିଳିଛି ।
ସୂଚନାନୁସାରେ, ଗୁଜରାଟର ଅହମ୍ମଦାବାଦରେ ଜଣେ କାର ଚାଳକ ନିୟମ ଉଲ୍ଲଂଘନ କରିଥିବାରୁ ତାଙ୍କ ନାମରେ ୯ ଲକ୍ଷ ୮୦ ହଜାର ଟଙ୍କାର ଚାଲାଣ କଟାଯାଇଛି । ସେ ସିଟ ବେଲ୍ଟ ବାନ୍ଧି ନ ଥିଲେ କି ତାଙ୍କ ପାଖରେ ଡ୍ରାଇଭିଂ ଲାଇସେନ୍ସ ଓ ଗାଡିର କାଗଜପତ୍ର ନ ଥିଲା । କୁହାଯାଉଛି କି, ନୂଆ ମଟରଯାନ ଆଇନ ଲାଗୁ ହେବା ପରେ ଏହା ହେଉଛି ସବୁଠୁ ବଡ ଜରିମାନା। ଯେଉଁ ଗାଡିର ଚାଲାଣ କଟିଛି, ତାହା ହେଉଛି ପୋରସ୍କେ କମ୍ପାନୀର ସବୁଠାରୁ ଦାମୀ ଗାଡି । ବଜାରରେ ଏହି ଗାଡିର ଦାମ୍ ପାଖାପାଖି ସାଢେ ଦୁଇ କୋଟି ଟଙ୍କା ହେବ । ଗୁଜରାଟ ପୁଲିସ ବିଗତ କିଛି ମାସରେ ଏପରି ୧୦ଟି ଦାମୀ ଗାଡିର ଚାଲାଣ କାଟିଛି ।