ଉଦ୍ଧାର ହେଲେ ୨୭ ଦାଦନ ଶ୍ରମିକ

ରାୟଗଡା :  ରାୟଗଡା ରେଳ ଷ୍ଟେସନରୁ ୨୭ଜଣ ଦାଦନ ଶ୍ରମିକଙ୍କୁ ଉଦ୍ଧାର କରାଯାଇଛି । ପୋଲିସ ଏବଂ ଜିଆରପି ସେମାନଙ୍କୁ ଉଦ୍ଧାର କରିଛି । ଉଦ୍ଧାର ହୋଇଥିବା ୨୭ଜଣ ଶ୍ରମିକଙ୍କୁ କାମ ଯୋଗାଇବାର ପ୍ରଲୋଭନ ଦେଖାଇ ପଡୋଶୀ ଆନ୍ଧ୍ରପ୍ରଦେଶକୁ ଚାଲାଣ କରାଯାଉଥିଲା । ସେହି ସମୟରେ ପୋଲିସ ସେମାନଙ୍କୁ ଉଦ୍ଧାର କରିଥିଲା । ଏହାସହ ସେମାନଙ୍କୁ ନେଉଥିବା ୫ଜଣ ଦଲାଲଙ୍କୁ ମଧ୍ୟ ପୋଲିସ ଅଟକ ରଖିଛି ।

ପୋଲିସର କହିବାନୁସାରେ, ଦାଦନ ଶ୍ରମିକମାନେ ରାୟଗଡା ଜିଲ୍ଲାର ମୁନିଗୁଡା ଏବଂ ଚନ୍ଦ୍ରପୁର ଅଂଚଳର ଅଟନ୍ତି । ସେମାନଙ୍କୁ ଇଟାଭାଟି ଏବଂ ଚିଙ୍ଗୁଡି ଫାର୍ମରେ କାମ କରାଇବାକୁ କହି ବିଳାସପୁର-ତିରୁପତି ଏକ୍ସପ୍ରେସରେ ଚାଲାଣ କରାଯାଉଥିଲା । ଉଦ୍ଧାର ହୋଇଥିବା ୨୭ଜଣ ଶ୍ରମିକଙ୍କ ମଧ୍ୟରେ ୧୮ଜଣ ମହିଳା, ୨ଜଣ ପୁରୁଷ ଓ ୭ଜଣ ନାବାଳିକା ରହିଛନ୍ତି । ସମସ୍ତଙ୍କୁ ଶ୍ରମ ବିଭାଗକୁ ହସ୍ତାନ୍ତର କରାଯାଇଛି ।