ଭୁବନେଶ୍ବର : ଆସନ୍ତା ଜାନୁଆରି ୧୫ରୁ ଯୁକ୍ତ୨ ପ୍ରାକ୍ଟିକାଲ ପରୀକ୍ଷା। ଏଥିପାଇଁ ଚଳିତ ମାସଠାରୁ ଫର୍ମ ପୂରଣ ପ୍ରକ୍ରିୟା ଆରମ୍ଭ ହେବ। ପ୍ରଥମେ ଏକ୍ସ-ରେଗୁଲାର ଓ ପରେ ରେଗୁଲାର ଛାତ୍ରଛାତ୍ରୀଙ୍କ ଫର୍ମ ପୂରଣ କରାଯିବ। ହାତରେ ଆଉ ଅଳ୍ପ ଦିନ ବାକି ଥିବା ବେଳେ ଯୁକ୍ତ୨ କଲେଜ(ଉଚ୍ଚ ମାଧ୍ୟମିକ ବିଦ୍ୟାଳୟ)ଗୁଡ଼ିକ ୨୦୧୮ ପରୀକ୍ଷାରେ ବିଭିନ୍ନ ବାବଦରେ ଖର୍ଚ୍ଚ ହୋଇଥିବା ଅର୍ଥର ବିଲ୍ ଏ ପର୍ଯ୍ୟନ୍ତ ଦାଖଲ କରିନାହାନ୍ତି। ଯେଉଁଥିପାଇଁ ୨୦୧୮-୧୯ ଶିକ୍ଷାବର୍ଷରେ ନାମ ଲେଖାଇଥିବା ଛାତ୍ରଛାତ୍ରୀଙ୍କ ପଞ୍ଜୀକରଣ ପୂର୍ବରୁ ନାଲିଆଖି ଦେଖାଇଛି ଉଚ୍ଚ ମାଧ୍ୟମିକ ଶିକ୍ଷା ପରିଷଦ। ଆସନ୍ତା ୧୨ ତାରିଖ ସୁଦ୍ଧା ସମସ୍ତ ବକେୟା ଅର୍ଥ ଦାଖଲ କରିବାକୁ କଲେଜ ଅଧ୍ୟକ୍ଷମାନଙ୍କୁ ନିର୍ଦେଶ ଦିଆଯାଇଛି। ନ ହେଲେ ଛାତ୍ରଛାତ୍ରୀଙ୍କ ନାମ ପଞ୍ଜୀକରଣ ବିଳମ୍ବ ହେଲେ କଲେଜ କର୍ତୃପକ୍ଷ ଦାୟୀ ରହିବେ ବୋଲି କୁହାଯାଇଛି।
ଏବେ ସୁଦ୍ଧା ପ୍ରାୟ ଅଳ୍ପ କିଛି କଲେଜ ସମସ୍ତ ତଥ୍ୟ ପରିଷଦ ନିକଟରେ ଦାଖଲ କରିସାରିଛନ୍ତି। ଆହୁରି ଅନେକ କଲେଜ ସେମାନଙ୍କ ଫି’ ଦାଖଲ କରିନାହାନ୍ତି। ସବୁଠାରୁ ଅଧିକ ୮୦୧ କଲେଜ ୨୦୧୮-୧୯ ଶିକ୍ଷାବର୍ଷର ଆଫିଲିଏସନ ଫି’ ଏ ପର୍ଯ୍ୟନ୍ତ ଦାଖଲ କରିନାହାନ୍ତି। ଏଥିସହ ମୂଲ୍ୟାୟନ କେନ୍ଦ୍ର କ୍ଲିୟରାନ୍ସ, ପରୀକ୍ଷା କେନ୍ଦ୍ର ଓ ପରୀକ୍ଷା ପରିଚାଳନା ହବ୍ର ଖର୍ଚ୍ଚ ବିଲ୍, ଛାତ୍ରଛାତ୍ରୀଙ୍କ ସାର୍ଟିଫିକେଟ୍ ଫି’, ଏନ୍ଏସ୍ଏସ୍ ଫି’ ମଧ୍ୟ ବକେୟା ଗଡ଼ୁଛି।
ବାରମ୍ବାର କହିବା ସତ୍ତ୍ବେ ଯେଉଁ କଲେଜଗୁଡ଼ିକ ବିଭିନ୍ନ ସେକ୍ସନରେ ବାକି ଥିବା ଅର୍ଥ ଦାଖଲ ନ କରନ୍ତି ସେମାନେ ଭବିଷ୍ୟତରେ ଅସୁବିଧାର ସମ୍ମୁଖୀନ ହେବେ। ଛାତ୍ରଛାତ୍ରୀଙ୍କ ପଞ୍ଜୀକରଣ ନମ୍ବର ନିର୍ଦ୍ଧାରିତ ସମୟରେ ପ୍ରକାଶ ନ ପାଇଲେ କଲେଜ କର୍ତୃପକ୍ଷ ଦାୟୀ ରହିବେ ବୋଲି ସ୍ପଷ୍ଟ କରାଯାଇଛି।
Prasanta Patnaik