ଆର୍ଏସ୍ପିର ୬୩ ଜଣ ଅଧିକାରୀ ୨୫ ବର୍ଷ ପୂର୍ତ୍ତି ନିମନ୍ତେ ସମ୍ବର୍ଦ୍ଧିତ

ରାଉରକେଲା, ୧୧ା୮: ଆର୍ଏସ୍ପି ସିଇଓଙ୍କ କାର୍ଯ୍ୟାଳୟ ଠାରେ ଅନୁଷ୍ଠିତ ଏକ ଉତ୍ସବରେ ଆର୍ଏସ୍ପି ସିଇଓ ଅଶ୍ୱିନୀ କୁମାର ସିନିୟର ମ୍ୟାନେଜର ଓ ତଦ୍ଦୁର୍ଦ୍ଧ୍ୱ ସ୍ତରର ୬୪ ଜଣ ବରିଷ୍ଠ ଅଧିକାରୀଙ୍କୁ ଦୀର୍ଘକାଳୀନ ସେବା ପୁରସ୍କାର ପ୍ରଦାନ କରିଛନ୍ତି । ଏହି ଅବସରରେ କାର୍ମିକ ଓ ପ୍ରଶାସନ ବିଭାଗର ଇଡି ପି.କେ. ପ୍ରଧାନ, ଚିକିତ୍ସା ଓ ସ୍ୱାସ୍ଥ୍ୟସେବା ବିଭାଗର ନିର୍ଦ୍ଦେଶକ ଡାକ୍ତର ଏସ୍.ଏସ୍. ପତି, ବହୁ ମହାପ୍ରବନ୍ଧକ ଓ କାରଖାନାର ଅନ୍ୟ ବରିଷ୍ଠ ଅଧିକାରୀ ଉପସ୍ଥିତ ଥିଲେ । ଏହି ଅବସରରେ ନିଜର ଉଦ୍ବୋଧନରେ ଶ୍ରୀ କୁମାର ବରିଷ୍ଠ ଅଧିକାରୀମାନଙ୍କୁ କମ୍ପାନୀରେ ଦୀର୍ଘବର୍ଷର ସମର୍ପିତ ସେବା ପ୍ରଦାନ ନିମନ୍ତେ ଅଭିନନ୍ଦନ ଜଣାଇଥିଲେ ।

ସମସ୍ତ ଅଧିକାରୀ ବହୁ ପ୍ରମୁଖ ସ୍ଥାନରେ ନିୟୋଜିତ ଥିବା ପରିପ୍ରେକ୍ଷୀରେ ଶ୍ରୀ କୁମାର ସେମାନଙ୍କ କାର୍ଯ୍ୟ ନିପୁଣତା ଓ ବିବିଧ ଅଭିଜ୍ଞତା ପାଇଁ ଅନ୍ୟାନ୍ୟ ସ୍ଥାନରେ ମଧ୍ୟ ବୈଷୟିକ ଜ୍ଞାନ ଆହରଣ ନିମନ୍ତେ ଆହ୍ୱାନ ଜଣାଇଥିଲେ । ଏକ ସୁସ୍ଥ ଓ ଆନନ୍ଦମୟ ଜୀବନଧାରଣ ନିମନ୍ତେ ଶ୍ରୀ କୁମାର ସମସ୍ତଙ୍କୁ ନିଜ ନିଜ ସ୍ୱାସ୍ଥ୍ୟର ଯତ୍ନ ନେବା ତଥା ନିୟମିତ ଶାରୀରିକ ବ୍ୟାୟାମ କରିବା ଉପରେ ମଧ୍ୟ ବିଶେଷ ଜୋର ଦେଇଥିଲେ ।

ଏହି ଅବସରରେ ନିଜର ଅଭିଭାଷଣରେ ଶ୍ରୀ ପ୍ରଧାନ ବରିଷ୍ଠ ଅଧିକାରୀମାନଙ୍କୁ ସେଲ୍ ଭଳି ମହାରତ୍ନ କମ୍ପାନୀର ସେବାରେ ନିଜ ଜୀବନର ମୂଲ୍ୟବାନ ସମୟ ଅତିବାହିତ କରିଥିବା ତଥା କମ୍ପାନୀର ଯାତ୍ରାପଥର ବିଭିନ୍ନ କାଳରେ ସହଯୋଗ ଓ ସହାୟତା ଯୋଗାଇ ଦେଇଥିବାରୁ ସେମାନଙ୍କର ଭୂୟସୀ ପ୍ରଶଂସା କରିଥିଲେ । ପିଏଲ୍ଓଡି ବିଭାଗର ଡିଜିଏମ୍ ରବି ବର୍ମାଙ୍କ ତତ୍ତ୍ୱାବଧାନରେ ମ୍ୟାନେଜର ଏସ୍.ଏସ୍. ମହାପାତ୍ର କାର୍ଯ୍ୟକ୍ରମ ସଂଯୋଜନା କରିଥିଲେ ।