ବେଜିଂ, ଅଗଷ୍ଟ ୧୩ : ତାଇୱାନ ପ୍ରସଙ୍ଗରେ ଚୀନ୍ ଏବଂ ଆମେରିକା ମଧ୍ୟରେ ଦିନକୁ ଦିନ ତିକ୍ତତା ବୃଦ୍ଧି ପାଉଛି । 41 ବର୍ଷ ପରେ ତାଇୱାନ ଗସ୍ତରେ ଆସିଥିବା ଆମେରିକୀୟ ସଂସଦୀୟ ନେତାଙ୍କ ଗୋଷ୍ଠୀକୁ ଚୀନ୍ ଦୃଢ ବିରୋଧ କରିଛି । ଚୀନ୍ ଏହାକୁ ବିଶ୍ୱାସଘାତକତା ବୋଲି କହିଛି ଏବଂ ଆମେରିକା ସୀମା ମଧ୍ୟରେ ରହିବା ଉଚିତ୍ ବୋଲି ଆମେରିକାକୁ ଚେତାଇ ଦେଇଛି । ଚୀନ୍ ଚେତାବନୀ ଦେଇଛି ଯେ ଆମେରିକା ନିଆଁ ସହ ଖେଳୁଛି ଏବଂ ଯଦି ଏହା ଜାରି ରହେ ତେବେ ସବୁକିଛି ଜଳିଯିବ।
ତାଇୱାନରେ ପହଞ୍ଚିଥିବା ଆମେରିକାର ସ୍ୱାସ୍ଥ୍ୟମନ୍ତ୍ରୀ ଆଲେକ୍ସ ଅଜାର ମଧ୍ୟ ତାଇୱାନର ପୂର୍ବତନ ରାଷ୍ଟ୍ରପତି ଲି ଟେଙ୍ଗ ହୁଇଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । ଚୀନ୍ ବୈଦେଶିକ ମନ୍ତ୍ରଣାଳୟର ମୁଖପାତ୍ର ଝାଓ ଲିଜାନ୍ କହିଛନ୍ତି ଯେ ଚୀନ୍ର ମୌଳିକ ସ୍ୱାର୍ଥକୁ ପ୍ରଭାବିତ କରିବା ନେଇ ଆମେରିକା ଯେଉଁ ଉଦ୍ୟମ କରୁଛି ତାହା କେବେ ବି ସଫଳ ହେବନି । କଡା ଶବ୍ଦ ବ୍ୟବହାର କରି ସେ କହିଛନ୍ତି ଯେ ଯେଉଁମାନେ ନିଆଁ ସହିତ ଖେଳୁଛନ୍ତି ସେମାନେ ଏଥିରେ ନିଜକୁ ନିଜେ ହିଁ ଜାଳି ଦେବେ | ଏଥି ସହିତ ଚୀନ୍ ବୈଦେଶିକ ମନ୍ତ୍ରଣାଳୟର ମୁଖପାତ୍ର ତାଇୱାନୀୟମାନଙ୍କୁ ଚେତାବନୀ ଦେଇ କହିଛନ୍ତି ଯେ ସେମାନେ ବିଦେଶୀମାନଙ୍କ ଅଧୀନତାକୁ ଗ୍ରହଣ କରିବା ଉଚିତ୍ ନୁହେଁ କିମ୍ବା ବିଦେଶୀମାନଙ୍କ ସାହାଯ୍ୟ ଉପରେ ବିଶ୍ୱାସ କରିବା ଉଚିତ୍ ନୁହେଁ । ତାଇୱାନ ଚୀନର ଏକ ଅବିଚ୍ଛେଦ୍ୟ ଅଙ୍ଗ ଏବଂ ଯଦି ଏହା ସ୍ୱାଧୀନ ଦେଶ ବୋଲି ନିଜକୁ ଘୋଷଣା କରେ ତେବେ ଚୀନ ପକ୍ଷରୁ ତୁରନ୍ତ ସାମରିକ କାର୍ଯ୍ୟନୁଷ୍ଠାନ ଗ୍ରହଣ କରାଯିବ |
Prasanta Patnaik