ନୂଆଦିଲ୍ଲୀ : ସୋମବାର ଦିନ ଭାରତର ପ୍ରଧାନ ବିଚାରପତି ରଞ୍ଜନ ଗୋଗୋଇ କହିଛନ୍ତି ଯେ ଲୋକେ ନ୍ୟାୟାଳୟକୁ ଯାଇ ପାରୁ ନାହାନ୍ତି ବୋଲି ହୋଇଥିବା ଅଭିଯୋଗ ବିଷୟରେ ମୁଖ୍ୟ ବିଚାରପତିଙ୍କ ସହ କଥାବାର୍ତ୍ତା କରିବାକୁ ସେ ଜମ୍ମୁ ଓ କଶ୍ମୀର ହାଇକୋର୍ଟକୁ ଯିବେ।
ହାଇକୋର୍ଟକୁ ନ ଯାଇ ପାରିବା କଥାଟି ଗୁରୁତର ହୋଇଛି। ଏ ସଂକ୍ରାନ୍ତରେ ଆମେ ହାଇକୋର୍ଟର ମୁଖ୍ୟ ବିଚାରପତିଙ୍କ ଜବାବ ଚାହିଁଛୁ। ଯଦି ଆବଶ୍ୟକ ପଡ଼େ, ମୁଁ ହାଇକୋର୍ଟକୁ ଯାଇ ମୁଖ୍ୟ ବିଚାରପତିଙ୍କ ସହ କଥାବାର୍ତ୍ତା କରିବି। ଯଦି ଲୋକେ ହାଇକୋର୍ଟକୁ ଯାଇ ପାରୁ ନାହାନ୍ତି, ତେବେ ଆମକୁ କିଛି କରିବାକୁ ପଡ଼ିବ ବୋଲି ଗୋଗୋଇ କହିଛନ୍ତି। ଶୁଣାଣି ସମୟରେ ସରକାରଙ୍କ ପ୍ରତିନିଧିତ୍ୱ କରୁଥିବା ସଲିସିଟର୍ ଜେନେରାଲ୍ କେକେ ବେଣୁଗୋପାଳ କହିଛନ୍ତି କି, ଲୋକ ଅଦାଲତ ସମେତ ଜମ୍ମୁ ଓ କଶ୍ମୀରରେ ସମସ୍ତ ଅଦାଲତରେ କାର୍ଯ୍ୟ ଚାଲୁଛି।
ବେଣୁଗୋପାଳ କହିଲେ ଯେ କଶ୍ମୀରରୁ ଖବର ସଂଗ୍ରହ ପାଇଁ ଗଣମାଧ୍ୟମ ପରିକ୍ରମା କରୁଛି। ବିନା କଟକଣାରେ ଉପତ୍ୟକାରୁ ପ୍ରକାଶିତ ଖବରକାଗଜରେ ତାହା ପ୍ରକାଶିତ ହେଉଛି। ଏ ସଂକ୍ରାନ୍ତରେ ନିଆଯାଇଥିବା ପଦକ୍ଷେପ ସଂକ୍ରାନ୍ତରେ ସବିଶେଷ ବିବରଣୀ ଉଲ୍ଲେଖ କରି ସତ୍ୟପାଠ ଦାଖଲ କରିବାକୁ ସୁପ୍ରିମ୍ କୋର୍ଟ ଖଣ୍ଡପୀଠ ବେଣୁଗୋପାଳଙ୍କୁ କହିଛନ୍ତି।
Prasanta Patnaik