ଅସ୍ତମିତ ଅଜିତ ଦାଶ, କୋଭିଡ କଟକଣା ମଧ୍ୟରେ ଆଜି ହେବ ଶେଷକୃତ୍ୟ

ଭୁବନେଶ୍ବର, ସେପ୍ଟେମ୍ବର ୧୪ : ଓଲିଉଡର ବର୍ଷୀୟାନ ଅଭିନେତା ଅଜିତ ଦାଶଙ୍କର ଗତକାଲି ୭୧ବର୍ଷ ବୟସରେ ଭୁବନେଶ୍ୱରରେ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଦେହାନ୍ତ ହୋଇଥିଲା । ପରିବାର ଓ ସମ୍ପର୍କୀୟଙ୍କ ଉପସ୍ଥିତିରେ ଆଜି କୋଭିଡ଼ ନିୟମ ଅନୁସାରେ ସତ୍ୟନଗର ଶ୍ମଶାନଘାଟରେ ତାଙ୍କର ଶେଷକୃତ୍ୟ ହେବ।

ଓଲିଉଡ ଚଳଚ୍ଚିତ୍ର ଜଗତରେ ଅଜିତ ଦାଶ ଏକ ସ୍ୱତନ୍ତ୍ର ପରିଚୟ । ଯିଏ ଅନେକ କଳାକାରଙ୍କୁ ସୃଷ୍ଟି କରିବାରେ ପ୍ରମୁଖ ଦାୟିତ୍ବ ବହନ କରିଆସୁଥିଲେ । ସେ ମୟୂରଭଞ୍ଜ ଜିଲ୍ଲାର କରଞ୍ଜିଆରେ ୧୯୪୯ ମସିହା ଜାନୁଆରୀ ୨୦ ତାରିଖରେ ଜନ୍ମ ଗ୍ରହଣ କରିଥିଲେ । ସେ ଏକାଧାରରେ ଥିଲେ ଜଣେ ଅଭିନେତା, ନିର୍ଦ୍ଦେଶକ ଓ ନାଟ୍ୟଗୁରୁ ।

ସ୍ବର୍ଗତ ଦାଶଙ୍କ ଅଭିନୀତ ୬୦ରୁ ଅଧିକ ଓଡିଆ ଫିଲ୍ମର ବଳିଷ୍ଠ ଅଭିନୟର ଛାପ ଲୋକଙ୍କ ନିକଟତର କରିପାରିଛି । ଉତ୍କଳ ସଂଗୀତ ମହାବିଦ୍ୟାଳୟର ଡ୍ରାମା ବିଭାଗର ମୁଖ୍ୟ ଭାବେ ଦାୟିତ୍ୱ ତୁଲାଇଛନ୍ତି ଅଜିତ ଦାଶ । ତାଙ୍କ ବିୟୋଗରେ ଓଲିଉଡରେ ବିରାଟ ଶୂନ୍ୟତା ସୃଷ୍ଟି ହୋଇଛି ।