ଅପହୃତ ଯୁବକଙ୍କ କଙ୍କାଳ ଜବତ

ନୟାଗଡ଼ : ନୟାଗଡ଼ ଜିଲ୍ଲା ଶରଣକୁଳ ଥାନା କଲ୍ୟାଣପୁର ଗାଁର ଜଣେ ଅପହୃତ ଯୁବକଙ୍କ କଙ୍କାଳ ଜବତ କରାଯାଇଛି। ଖୋର୍ଦ୍ଧା ଜିଲ୍ଲା ଜଙ୍କିଆ ନିକଟରୁ ଏହାକୁ ଜବତ କରାଯାଇଥିବା ପୁଲିସ୍‌ ସୂଚନା ଦେଇଛି। ମୃତକଙ୍କ ନାଁ ରବି ପ୍ରଧାନ।

ଗତ ମାସ ୧୫ ତାରିଖରେ ରବି ଏକ ବାଇକ୍‌ରେ ବଜାରକୁ ବୁଲିବାକୁ ଯାଇଥିଲେ। ହେଲେ ସନ୍ଧ୍ୟା ଯାଏ ଘରକୁ ନଫେରିବାରୁ ତାଙ୍କ ମାଆ ଫୋନ୍ କରିଥିଲେ। ଦୁଇରୁ ତିନି ଜଣ ଲୋକ ତାଙ୍କୁ ପିଛା କରୁଥିବା ରବି ତାଙ୍କ ମାଆଙ୍କୁ କହିଥିଲେ। ତା’ପରଠୁ ତାଙ୍କ ଫୋନ୍ ଲାଗି ନଥିଲା। ଏନେଇ ରବିଙ୍କ ମାଆ ଶରଣକୁଳ ଥାନାରେ ଲିଖିତ ଭାବେ ଅଭିଯୋଗ କରିଥିଲେ। ଏହାପରେ ପୁଲିସ୍‌ ଏକ ମାମଲା ରୁଜୁ କରିଥିଲା।

ଗତକାଲି ଏହି ଘଟଣାରେ ଜାମୁ ଝୋଲା ଗାଁର ବାଳକୃଷ୍ଣ ବରାଡ଼କୁ ପୁଲିସ ଥାନାରେ ଅଟକ ରଖି ପଚରାଉଚରା କରିଥିଲା। ରବିଙ୍କୁ ସେ ଏବଂ ତାର ସାଙ୍ଗମାନେ ମିଶି ହତ୍ୟା କରିଥିବା ସ୍ୱୀକାର କରିଥିଲା । ଏହାପରେ ଶରଣକୁଳ ପୁଲିସ୍‌ ଘଟଣାସ୍ଥଳରୁ କଙ୍କାଳ ଜବତ କରି ଡିଏନଏ ଟେଷ୍ଟ୍‌ ପାଇଁ ପଠାଇଛି।